काठमाडौं, १०  माघ ।  चैत १७ गतेदेखि हुने धनगढी प्रिमियर लिग डिपिएल क्रिकेट खेल्ने टिमका मालिक र रणनीतिक खेलाडी सार्वजनिक गरिएको छ ।

डिपिएलका दोस्रो संस्करणमा नयाँ टिम थपिएको छ । यसअघिको कञ्चनपुर आइकोनिकको ठाउँमा यसपटक महेन्द्रनगर युनाइटेडले खेल्ने भएको छ ।

शरद भेषवाकर नखेल्ने भएपछि विराटनगर किंग्सको रणनीतिक खेलाडी पारस खड्का भएका छन् । पारसले पहिलो संस्करणको डिपिएलमा टिम चौराह धनगढीको नेतृत्व गर्दै उपाधि जितेका थिए । यस्तै टिम चौराह धनगढीको रणनीतिक खेलाडी सोमपाल कामी, सिवाइसी अत्तरियाका लागि दीपेन्द्रसिंह ऐरी, महेन्द्रनगर युनाइटेडका लागि विनोद भण्डारी, काठमाडौं गोल्डेन्सका लागि ज्ञानेन्द्र मल्ल र रुपन्देही च्यालेन्जर्सको रणनीतिक खेलाडी शक्ति गौचन छन् ।

हरेक टिममा रहेका रणनीतिक खेलाडीले टिमको समन्वय गर्नेछन् भने सहयोगी पनि हुनेछन् । रणनीतिक खेलाडी कप्तान हुन वा नहुन पनि सक्नेछन । सिवाइसी अत्तरियालाई क्रिएटिभ युथ क्लवले सञ्चालन गर्नेछ ।

यस्तै महेन्द्रनगर युनाइटेडका लगानीकर्ता सुशीलकुमार श्रेष्ठ छन् भने विराटनगर किंग्सका लगानीकर्ता पूर्वखेलाडी पारस लुनिया रहेका छन् । त्यसैगरी रुपन्देही च्यालेन्जर्सका लगानीकर्ता सुरज उप्रेती, टिम चौराह धनगढीका राजकुमार श्रेष्ठ र काठमाडौं गोल्डेन्सका लगानीकर्ता गोल्डेनगेट एजुकेशन नेटवर्क रहेको डिडिएल आयोजक धनगढी क्रिकेट एकेडेमी डिसिएका प्रमुख सुवास शाहीले जानकारी दिनुभयो ।

डिपिएलको विजेताले घरेलु क्रिकेटकै अहिलेसम्मको सर्वाधिक २५ लाख रुपैयाँ नगद पुरस्कार पाउनेछन् । यस्तै उपविजेताले १० लाख रुपैयाँ र तेस्रो स्थानको टिमले ३ लाख तथा चौथो हुने टिमले २ लाख रुपैयाँ पुरस्कार पाउनेछन् ।

हरेक खेलका म्यान अफ द म्याचले १० हजार र प्रतियोगिताको उत्कृष्ट खेलाडीले टिभिएस मोटरसाइकल पाउने शाहीले जानकारी दिनुभयो ।

प्रतियोगितामा सहभागी ६ वटा टिमले २ जनाका दरले विदेशी खेलाडी राख्नैपर्ने नियम राखिएको छ । यस्तै एक जना खेलाडी सुदूरपश्चिमका हुनै पर्नेछ ।

खेलाडीको वोलकवोल फागुन ५ गते हुनेछ । डिपिएलमा पुरस्कारको लागि मात्रै ५० लाख र कुल खर्च ३ करोड रुपैयाँ हुने अनुमान गरिएको छ ।