काठमाडौं, ९ पुस । “आत्मनिर्भरताको आधार, स्वदेशी बस्तुको प्रयोग” भन्ने मुल नाराका साथ पुस १३ देखि काठमाडौंको भृृकुटीमण्डप प्रदशर्नी हलमा जुत्ता चप्पल तथा छालाजन्य बस्तुहरुको १४ औं राष्ट्रिय औधोगिक प्रदशर्नी सञ्चालन हुदैछ ।

प्रदर्शनीमा देश भरीका साना, मझौला एवं ठुला उधोगहरुद्वारा उत्पादित जुत्ता चप्पल वा छालाजन्य वस्तुहरुको उत्पादन रहने छ । प्रदर्शनीमा १ सय ३५ वटा स्टलहरु रहनेछ । जसमा स्पोर्टस, क्याजुअल देखि स्कुल कलेजको युनिर्फमको जुत्ता, लेडिज तथा जेन्सको चप्पल एवं फुड स्टलहरु रहनेछन् । प्रदर्शनीमा उधोग संग सम्बन्धित व्यक्तिहरु, उधोग सञ्चालनका लागि चाहिने कच्चापदार्थको उत्पादक तथा बितरकहरुको समेत सहभागिता रहनेछ । अवलोकनकर्ताले विभिन्न उधोगहरु बाट उत्पादन भएका बस्तुहरु एउटै छानामुनी अवलोकन तथा प्रतिस्पर्धि मुल्यमा खरिद गर्न सक्नेछन् । जुत्ता चप्पलमा १५ प्रतिशतको छुटको व्यवस्था गरिएको छ भने प्रदर्शनी अवधीमा सञ्चालन गर्न लागिएको फेसन सो, उत्कृष्ट सजावट गर्ने उधोगहरुलाई वितरण गर्न लागिएको सम्मान पुरस्कारहरु प्रदर्शनीको प्रमुख आर्कषणको रुपमा रहनेछ ।

गोल्डस्टार र हात्तिछाप चप्पल, रोयल सुज, म्याजिक फुटवेयर प्रमुख प्रायोजक र कोसेली, क्यालिबर, मिलानो, राइनो, ब्याक हर्स, क्रसरोड, यति रेसिन ब्रान्डहरु प्रायोजक रहेको प्रदर्शनीलाई अर्थमन्त्री ज्ञानेन्द्र बहादुर कार्कीले उद्घाटन गर्नेछन् । प्रदर्शनी पुस १८ गते सम्म चल्नेछ ।