काठमाडौं, ९ पुस । प्रमुख प्रतिपक्ष दल नेपाली कांग्रेसको केन्द्रीय समिति बैठक तेस्रो दिन आज पनि जारी रहने भएको छ । आज दिउसो १ बजे पार्टीको केन्द्रीय कार्यालय सानेपामा बैठक बस्दैछ । हिजो दोस्रो दिनको बैठकपछि कांग्रेसका प्रवक्ता विश्वप्रकाश शर्माले सञ्चारकर्मीसंग कुरा गर्दै आजको बैठकले संसद् विघटनविरुद्ध आन्दोलन घोषणा गर्ने बताउनुभएको छ । तर बैठकमा चुनावमा जाने कि आन्दोलनमा भन्ने विषयमा सभापति शेरबहादुर देउवा र वरिष्ठ नेता रामचन्द्र पौडेलबीच चर्काचर्की भएको थियो । देउवा पक्ष चुनावमा सहभागी भएर कांग्रेसलाई आएको अवसर उपयोग गर्नुपर्ने पक्षमा छ भने पौडेल समूह आन्दोलनमा जानुपर्ने अडानमा छ । प्रवक्ता शर्माले भने संसद् विघटनपछि पुस ५ गते बसेको पार्टीको पदाधिकारी बैठक र कांग्रेसकै संयोजनमा बसेको सर्वदलीय बैठकले प्रतिनिधिसभा भंग गर्ने कदमलाई असंवैधानिक ठहर गरिसकेकाले कांग्रेस विरोधमै जाने दाबी गर्नुभएको छ । बुधबारको बैठकमा रामशरण महत, बलबहादुर केसी, आनन्दप्रसाद ढुंगाना र गगनकुमार थापाले धारणा राखेका थिए । बैठकले पुस १६ गते मेलमिलाप दिवस मनाउने निर्णय गरेको कांग्रेसले जनाएको छ ।