काठमाडौँ, २२ मंसिर । कृषि तथा पशुपन्छी विकासमन्त्री घनश्याम भुसालले नेपालको कृर्षि क्षेत्रमा आफुले उल्लेख्य काम गरेपनि त्यसको नतिजा तत्काल नदेखिएको बताउनु भएको छ ।

अर्घाखाची सिमेन्ट उद्योग प्रालिको सहयोगमा रुपन्देहीको सियारी गाउँपालिका–२ मा निर्माण गर्न लागेको स्वास्थ्य केन्द्र भवनको शिलान्यास गर्दै मन्त्री भुसालले विगतको कृर्षि नीतिभन्दा भिन्न तरिकाले काम गरेका कारण यसको नतिजा देखिन समय लाग्ने बताउनु भएको हो । ‘पुरानो घरलाई तोडेर नयाँ घर बनाउने क्रममा केही सरसमानहरु यताउता छुट्न सक्छन्, यो क्रममा केही कमजोरी पनि हुन सक्छन्’, मन्त्री भुषालले भन्नुभयो , ‘अब केही वर्ष पर्खिनुहोस् सबैले देखिने गरि रिजल्ट आउछ ।’

मन्त्रालयले अहिले कृर्षि उत्पादनलाई भण्डारण गर्न सहज होस् भन्ने हिसाबले प्रत्येक पालिकामा गोदाम निर्माणको तयारी भइरहेको बताउनुभयो । ‘अहिले कृषिकै कार्यक्रममा पौने ५ अर्ब बजेट पालिकामा पठाएका छौँ,’ उहाले भन्नुभयो , ‘एक महिनाभित्र प्रत्येक पालिकामा भन्डारण गर्न मिल्ने गरि गोदाम बनाउन थप १ अर्ब पठाउने तयारी गरेका छौँ ।’

कृर्षि मन्त्रालय अन्य मन्त्रालयजस्तो काम गरेको तत्काल देखिने मन्त्रालय नभएको भन्दै उहाँले कृर्षि मन्त्रालयलाई एउटा घरकी कान्छी बुहारीसँग तुलना गर्नुभयो ‘एउटी घरकी कान्छी बुहारीले घरका ससाना जति काम गरे पनि देखिँदैन हो, त्यस्तै यो मन्त्रालय पनि भएको छ ।’ उहाले भन्नुभयो ।

कृषिको विकासको लागि अहिले ३ वर्षको रणनीति तयार भएको बताउनुभयो । सियारी गाउँपालिकाका अध्यक्ष अयोध्या थारुले उद्योगले स्थानीय स्तरमा विभिन्न सहयोग गर्दै आएको बताउनुभयो । स्वास्थ्य केन्द्र निमार्णका लागि अर्घाखाँची सिमेन्ट उद्योगले करिब एक करोड खर्च गर्न लागेको प्रबन्ध निर्देशक राजेशकुमार अग्रवालले जानकारी दिनुभयो । ‘हामीले विगद केही वर्ष देखिनै स्वास्थ्य क्षेत्रमा लगानी गर्न चाहेका थियौँ । अहिले आएर अवसर पाएका छौँ’ उहाले भन्नुभयो ।
यो भवन यसै आर्थिक वर्षभित्र निमार्ण सम्पन्न गरेर हस्तान्तरण गर्ने अग्रवालले बताउनुभयो । ‘ए ग्रेड’को स्वास्थ्य चौकी निमार्णका लागि हामीले सहयोग गरेका छौँ । पछि यसलाई स्तरउन्नति गर्ने भए पनि उद्योगले थप सहयोग गर्ने छौँ ।’ उहाले भन्नुभयो । उद्योगका जिएम उद्वव कार्कीले उद्योगको सामाजिक उतरदायित्वअन्तर्गत यस्तो काम हरेक वर्ष हुने गरेको बताउँदै स्वास्थ्य क्षेत्रमा भने यो पहिलो भएको बताउनुभयो । गाउँपालिकाको विकासमा निजी क्षेत्रको सहयोग उल्लेख्य रहेको पालिका उपाध्यक्ष अमृता गुरुडले बताउनुभयो । मुलुकको विकास निजी क्षेत्रको उल्लेखनीय भूमिका रहेको रुपन्देहीका प्रमुख जिल्ला अधिकारी पिताम्बर घिमिरेले बताउनुभयो ।