काठमाडौं, ७ मंसिर । भारतीय विदेश सचिव हर्षवर्धन श्रृंगला मंसिर ११ गते दुई दिने औपचारिक भ्रमणका लागि काठमाडौं आउने पक्का भएको छ ।

नेपाल र भारतले यस सम्बन्धी छुट्टाछुट्टै औपचारिक घोषणा सोमबार साँझ प्रेस विज्ञप्ति मार्फत गर्ने तयारी छ । स्रोतका अनुसार भारतीय विदेश सचिव ११ गते विहान विशेष विमानद्धारा काठमाडौं ओर्लने कार्यक्रम तय भएको छ । त्यसलगत्तै उहाँ औपचारिक भेटघाटमा ब्यस्त हुनुहुने छ भने सोही दिन उहाले समकक्षी परराष्ट्र सचिव भरतराज पौडेलेसँग दुईपक्षीय भेटवार्ता गर्नुहुने छ ।

उहाले राष्ट्रपति विद्यादेवी भण्डारी, प्रधानमन्त्री केपी शर्मा ओली र परराष्ट्रमन्त्री प्रदीप ज्ञावलीसँग शिष्टाचार भेटवार्ता गर्ने कार्यक्रम तय भएको स्रोतले जनाएको छ । त्यसैगरी उहाले सोही दिन विपक्षी नेपाली कांग्रेसलगायतका दलका नेताहरुसँग पनि भेटवार्ता गर्नुहुने छ ।

मंसिर १२ गते उनले नेपाल–भारत सम्बन्ध विषयक एक कार्यक्रमलाई सम्बोधन गर्नुका साथै भारतीय विदेश सचिवले दुईपक्षीय परियोजनासम्बन्धी एक कार्यक्रममा सहभाता रहने छ । स्रोतका अनुसार भारतिय विदेश सचिवको भ्रमणको मुख्य उद्देश्य नेपाल–भारत संयुक्त आयोगको वैठकको तयारी गर्नु हो । दुवै देशका परराष्ट्रमन्त्रीले नेतृत्व गर्ने सो संयन्त्रको वैठक डिसेम्बर महिनाको दोस्रो साता नयाँ दिल्लीमा गर्ने तयारी छ । वैठकमा भाग लिनका लागि परराष्ट्रमन्त्री ज्ञवाली नयाँ दिल्ली जानुहुने छ ।