काठमाडौं, ११ भदौ । मंगलबार बसेको मन्त्रिपरिषद् बैठकको निर्णयहरु सार्वजनिक गरिएको छ । बिहीबार सरकारका प्रवक्ता डा. युवराज खतिवडाले मन्त्रिपरिषदका २२ निर्णय सार्वजनिक गर्नुभएको छ । मन्त्रिपरिषद् बैठकले केही कर्मचारीको सरुवा, बढुवा र पदस्थापनको निर्णय गरेको छ ।

मन्त्रिपरिषद बैठकले उद्योग, वाणिज्य तथा आपूर्ति मन्त्रालयका सहसचिव बलराम रिजाललाई विशेष आर्थिक क्षेत्र प्राधिकरणको कार्यकारी निर्देशकको काम गर्ने गरी तोकेको छ भने सेनाका प्रमुख सेनानी सरोजकुमार अधिकारीसमेत तीन प्रमुख सेनानीको बढुवा गरी पदस्थापन गरेको छ भने १२ महासेनानीको सरुवा पनि गरेको छ ।

बैठकले आर्थिक वर्ष ०७७/७८ का लागि वन तथा वातावरण मन्त्रालय अन्तर्गतका आयोजना तथा कार्यक्रमहरुका लागि राजपत्रांकित श्रेणीको ४५ अस्थायी दरबन्दी सिर्जना गर्ने निर्णय पनि गरेको सञ्चार तथा सूचना प्रविधिमन्त्री र अर्थमन्त्री डा. युवराज खतिवडाले जानकारी दिनुभयो ।