काठमाडौं, ८ भदौ । काठमाडौं उपत्यकाका तरकारी बजारमा अत्याधिक भिडभाड र चर्को मूल्यवृद्धिको गुनासो बढेपछि आपूर्तिको नेतृत्वमा सोमबार बिहानै कालीमाटी र बल्खु बजारको अनुगमन भएको छ । भोलिदेखि सरकारले किन्न जाने उपभोक्ताबाटै ठगी गर्नेहरुको अनुगमन गर्ने सरकारी तयारी छ ।

बजार भाऊ अत्याधिक बढेको गुनासो आएपछि सोमबार बिहान ४ चार बजे उद्योग वाणिज्य तथा आपूर्तिमन्त्री लेखराज भट्ट मन्त्री क्वाटरबाट काठमाडौंका तरकारी बजार अनुगमनमा निस्कनुभयो । मन्त्री भट्टले कालीमाटी फलफूल तथा तरकारी बजार र बल्खु बजारको अनुगमन गर्नुभएको मन्त्री भट्टका स्वकिय सचिव हितेष ओझाले बताउनुभयो । मन्त्री भट्टका स्वकिय सचिव ओझाका अनुसार व्यस्त तरकारी बजारमा हुने भीडभाड, उपभोक्ता र व्यवसायीले अपनाएको सुरक्षाका मापदण्ड लगायतका स्थितिबारे अनुगमन भएको छ ।

अत्यावश्यक वस्तुको कारोबार हुने स्थल कालीमाटी फलफूल तथा तरकारी बजार र बल्खु तरकारी बजारमा कोरोनाबाट जोगिनका लागि आवश्यक सुरक्षा मापण्ड नअपनाएको, भिडभाड बढेको र मूल्यवृद्धिको गुनासो आएपछि मन्त्री आफैं अनुगमनमा निस्कनुभएको हो । ओझाका अनुसार बल्खु तरकारी बजारमा भिडभाड देखिएको थियो । बजारमा न्यूनत्तम मापदण्ड कार्यान्वयन नभएको पनि अनुगमनमा भेटिएको थियो । अनुगमनका क्रममा मन्त्री भट्टले विभिन्न तरकारी पछिल्लो मूल्य अवस्थाबारे जानकारी लिनुभएको थियो । मन्त्री भट्टले व्यवसायीलाई आपूर्ति व्यवस्था र कोरोना भाइरसबाट जोगिनका लागि आवश्यक सुरक्षा मापदण्ड पालना गर्न आग्रह समेत गर्नुभएको छ ।

अनुगमनमा मौसमी तरकारीको मूल्य बढेको भेटिएको थियो । मन्त्री भट्टले बजार ठगी गर्ने कुनै क्रियाकलाप गरिएमा कारबाही गर्ने चेतावनीसमेत दिनुभयो । त्यसबाहेक व्यवसायी एवं उपभोक्ताले स्वास्थ्य सुरक्षा मापदण्ड नअपनाए कारबाही गर्न उहाँले नजिकका प्रहरीलाई निर्देशन दिनुभएको थियो । मंगलबारदेखि स्वयं उपभोक्तालाई खुल्ला बजारमा किनमेलमा पठाएर अनुगमनको नयाँ शैली अपनाउने तयारी गरिएको ओझाले जानकारी दिनुभएको छ । पछिल्लो समय काठमाडौं उपत्यकामा कोरोनाका संक्रमित बढेसँगै उपत्यकाका जिल्ला प्रशासनले भदौ १० गतेसम्मका लागि निषेधाज्ञा आदेश जारी गरेका छन् ।