काठमाडौं, १८ मंसिर । झण्डै ५ करोड रकम हिनामीना गरेको अभियोगमा प्रहरीले कृषि विकास बैकका कर्मचारी दिपीका रेग्मीसहित तीन जनालाई पक्राउ गरेको छ । पक्राउ पर्नेमा बैकंको न्युरोड शाखामा कार्यरत रेग्मीसंगै प्रकाश घतानी र रेमशकुमार थापा रहेका छन् ।

रकम हिनामीना प्रकरणमा रेग्मीको मुख्य संलग्नता रहेको देखिएको छ । अन्तर शाखा कारोबारमा हिसाब क्लियरिङको रकम पेण्डिङ भएको देखिएपछि ४ करोड ९१ लाख हिनामिना गरेको पाइएको हो।

सहायक टेलर रेग्मीले सेवाग्राहीले जम्मा गरेको चेक ‘इलेक्ट्रोनिक चेक क्लियरेन्स’ (ईसीसी) बाट सम्वन्धित भुक्तानी दिए वापत जेनेरेट गरेको रिपोर्टलाई इडिट गरेर त्यही चेक पुनः प्रयोग गरेको र बैंकमा रहेको आफ्नो र आफन्तको खातामा रकम जम्मा गरेको खुल्न आएको छ । रेग्मीले रकम सुनचादी किन्न खर्च गरेको र केही रकम भने प्रकाश घतानीको खातामा जम्मा गरेकोखुलेको छ । पक्राउ परेका रमेशकुमारले भने रेग्मीको सहयोगीका रुपमा काम गरेको प्रहरीको अभियोग छ ।

प्रहरीले उच्च अदालत पाटनबाट ५ दिनको म्याद लिएर तीनै जना माथि
बैंकिङ कसुरमा अनुसन्धान थालेको छ ।