काठमाडौं, १४ मंसिर । इंग्लिस प्रिमियर लिग फुटबल अन्तर्गत गएराति भएको खेलमा आर्सनलले शानदार जित दर्ता गरेको छ ।

घरेलु मैदानमा भएको खेलमा आर्सनलले हडल्सफिल्डलाई ५–० ले हराएर महत्वपूर्ण तीन अंक जोडेको हो । आर्सनलको जितमा ओलिभर जिरउडले दुई तथा एलेक्जेन्डर लेकाजेट, एलेक्स सान्चेज र मेसुट ओजिलले एक एक गोल गरे । तेस्रो मिनेटमा लाकाजेटले गरेको गोलबाट पहिलो हाफमा १–० को अग्रता लिएको आर्सनलले दोस्रो हाफमा थप चार गोल ग¥यो । ६८ औं मिनेटमा जिरउडले व्यक्तिगत पहिलो गोल गर्दै आर्सनलको अग्रता दोब्बर पारे । त्यसको एक मिनेटपछि सान्चेज तथा ७२ औं मिनेटमा ओजिलले गोल गर्दै आर्सनललाई ४–० को अग्रता दिलाए । ६८ देखि ७२ औं गरी चार मिनेट भित्रमा तीन गोल भयो । ८७ औं मिनेटमा जिरउडले व्यक्तिगत दोस्रो गोल गरेपछि आर्सनलले ५–० को जित निश्चित गरेको हो । जितपछि चौथो स्थानको आर्सनलको १४ खेलबाट २८ अंक भएको छ । अर्को खेलमा स्वान्सी सिटीलाई १–० ले हराएको तेस्रो स्थानको चेल्सीको १४ खेलबाट २९ अंक भएको छ । चेल्सीको जितमा ५५ औं मिनेटमा एन्टोनियो रुडिगरले गरेको गोल नै निर्णायक बन्यो । यस्तै स्टोक सिटीलाई ३–० ले हराएको पाँचौं स्थानको लिभरपुलको १४ खेलबाट २६ अंक भएको छ । लिभरपुलको जितमा मोहमद सालहले दुई तथा साडिओ मानेले एक गोल गरे ।