काठमाडौं, ३ वैशाख । भारतमा वैशाख २१ गतेसम्म ‘लकडाउन’ जारी राखिने प्रधानमन्त्री नरेन्द्र मोदीले घोषणा गरेको भोलिपल्ट त्यहाँको गृह मन्त्रालयले लकडाउनसम्बन्धी निर्देशिका जारी गर्दै वैशाख ८ पछि कृषि गतिविधिलाई अनुमति दिइने बताएको छ ।

निर्देशिका बमोजिम वैशाख ८ पछि कृषिसँग सम्बन्धित गतिविधि खुकुलो पारिनेछ भने ब्याङ्क तथा सार्वजनिक सेवा पनि सहज पारिने बताइएको छ । कृषि अन्तर्गत दुध, चिया, कफी र रबर खेतीलाई पनि सहज तुल्याइने तथा कृषिसम्बन्धी सामग्री बेच्ने उपकरण तथा मल बेच्ने पसललाई पनि छुट दिइने कुरा निर्देशिकामा उल्लेख छ । नयाँ नियमहरूले आपूर्तिका सञ्जाललाई सहजीकरण गरेर अर्थतन्त्रमा परिरहेको प्रभावलाई कम गर्ने विश्वास व्यक्त गरिएको छ ।

यसैगरी दैनिक ज्यालादारी मजदुरको आम्दानीका स्रोत रहेका सार्वजनिक निर्माण कार्य पनि कडा सामाजिक दूरीका उपाय अपनाएर बैशाख ८ गतेदेखि नै खोलिने बताइएको छ । यस्तै मालबाहक ट्रक, रेल तथा कार्गो विमान सेवालाई पनि अनुमति दिइने जनाइएको छ । केही सातायता राज्यहरूबीच धेरै संख्यामा मालबाहक सवारीसाधन रोकिएपछि भारतको आपूर्ति प्रणालीमै समस्या आएको थियो ।

निर्देशिकाले ब्याङ्कका साथै सामाजिक सुरक्षा तथा पेन्सन बाँड्ने सरकारी केन्द्रहरू पनि खुल्ने व्यवस्था गरेको छ । लकडाउनको बेला अस्पताल र स्वास्थ्य सेवा तथा आपत्कालीन कर्मचारीको आवतजावतका निम्ति बाहेक सार्वजनिक यातायात, उडान तथा रेलसेवा, स्कुल तथा विश्वविद्यालय, धार्मिक मठमन्दिर र सबैखाले खेल गतिविधि बन्द रहनेछन् । भारतमा चैत १२ देखि भारतमा ’लकडाउन’ जारी छ ।