काठमाडौं, २१ फागुन । भारतले विभिन्न २६ प्रकारको औषधी निर्यात रोक लगाएको छ ।

कोरोना भाइरस संक्रमणले आफ्नो मुलक संकटमा फस्न सक्ने र उक्त समयमा हुने अभावको सामाना गर्न पारासिटामोलसहित २६ प्रकारका औषधी र कच्चा पदार्थ निर्यातमा रोक लगाएको भारतीय वाणिज्य एवं उद्योग मन्त्रालयका विदेश व्यापार महानिर्देशालयले यस्तो निर्णय गरेको हो।

सरकारले तोकेको २६ प्रकारका औषधी निर्यात गर्नुपूर्व सरकारसंग अनुमति लिनु पर्ने समाचारहरुमा जनाइएको छ । आन्तरिक मागलाई समीक्षा गरेरमात्रै सरकारले इजाजतको प्रक्रियामाथि विचार गर्ने समाचारमा भनिएको छ ।

कोरोनाले थलिएको चीनले बल्क मा औषधिका कच्चा पदार्थ निर्यात बन्द गरेपछि भारतमा थोकमा प्रतिकिलो २५० पर्ने पारासिटामोल ४१५ पुगेको छ। प्रतिकिलो ३० हजार रूपैयाँ पर्ने एन्जिथ्रोमाइसिन ५५ हजार पुगेको छ। यस्तै अन्य अत्यावश्यकको श्रेणीमा रहेका कच्चा पदार्थको मूल्य पनि ५० प्रतिशतसम्म बढेको छ।

यी हुन् भारतले निर्यात रोकेका औषधी

पारासिटामोल, टाइनिडाजोल, मेट्रोनाइडाजोल, एकिक्लोभिर, भिटामिन बी१, भिटामिन बी६, भिटामिन बी१२, प्रोजेस्टेरोन, क्लोरामफेनिकोल, एरिथ्रोमाइसिन साल्ट, नियोमाइसिन, क्लिन्डामाइसिन साल्ट, ओर्निडाजोल र यी औषधीबाट फर्मुलेट भएका अरु १३ प्रकारका औषधी रहेका छन् ।

भारतले अर्को सूचना जारी नभएसम्मका लागि औषधीहरुको कच्चा पदार्थको निर्यात पनि रोकेको छ ।