काठमाडौं, १२ फागुन । पोखरामा प्रधानमन्त्री केपी शर्मा ओलीलाई कालो झन्डा देखाउन प्रयास गर्ने ४ युवालाई प्रहरीले पक्राउ गरेको छ । प्रधानमन्त्रीलाई कालो झन्डा देखाउन लिएर जाने क्रममा पीएन क्याम्पस अघिबाट नेविसंघ र समाजवादी पार्टीका विद्यार्थी युनियनका ४ युवा पक्राउ परेका हुन् । पक्राउ पर्नेहरु नेपाली कांग्रेसको विद्यार्थी संगठन नेपाल विद्यार्थी संघका भीरध्वज जंग पौडेल जिएमसी उपाध्याक्ष, असिम पौडेल छन्। उनी पिएन क्याम्पस नेविसंघका सदस्य हुन्। थप पक्राउ पर्नेहरुमा समाजवादीको विद्यार्थी युनियन सम्बद्ध विशाल तिमिल्सिना, नेत्र चापागाईं रहेको प्रहरीले जनाएको छ ।

पार्टी प्रशिक्षण कार्यक्रमका लागि प्रधानमन्त्री ओली पोखरा पुग्नुभएको हो । सोमबार गण्डकी प्रदेशको पार्टी प्रशिक्षण कार्यक्रम छ । कालो झन्डा प्रकरणपछि प्रशिक्षणस्थल सभागृहमा पत्रकार प्रवेश गर्न कडाई गरिएको छ। नेकपा गण्डकी प्रदेशद्वारा आयोजित प्रदेशस्तरीय प्रशिक्षणलाई सम्बोधन गर्न उहां पोखरा पुग्नुभएको हो । प्रधानमन्त्री ओलीलाई पोखरा विमानस्थलको अतिविशिष्ट कक्षमा प्रदेश प्रमुख अमिक शेरचन, गण्डकी प्रदेशका मुख्यमन्त्री पृथ्वीसुब्बा गुरुङ, सभामुख नेत्रनाथ अधिकारी, प्रदेशका मन्त्री, प्रदेश मुख्य सचिव हरिप्रसाद बस्याल, प्रजिअ रमेशकुमार केसी, प्रदेशभित्रका सङ्घीय संसद्का सदस्य, प्रदेशसभा सदस्य, पार्टीका नेतालगायतले स्वागत गर्नुभएको थियो ।

प्रधानमन्त्री ओलीले प्रदेशस्तरीय प्रशिक्षणलाई सम्बोधन गर्ने कार्यक्रम रहेको नेकपा कास्कीका अध्यक्ष कृष्ण थापाले जानकारी दिनुभयो । उहांका अनुसार पोखरा सभागृहमा हुने प्रशिक्षणमा प्रदेश कमिटीका सम्पूर्ण पदाधिकारी, प्रदेशमा रहेका केन्द्रीय कमिटी सदस्य, जिल्ला कमिटीका पदाधिकारी, प्रदेशभित्रका गाउँपालिका, नगरपालिकाका अध्यक्ष एवम् उपाध्यक्षसहित झण्डै एक हजार ४०० जनाको सहभागिता छ ।