रौतहट,  २ साउन । रौतहट जिल्लाको चन्द्रपुर नगरपालिकामा रहेका होटल तथा लजहरूमा यौन व्यवसाय बढ्दै जान थालेको छ । राजमार्ग केन्द्रित यौन वयवसायीहरू पछिल्लो समय होटल केन्द्रित हुन थालेपछि यौन व्यवसाय बढेको हो ।

पहिला धन्सार–लमाह खण्डको जंगलमा यौन सम्पर्क गराउने युवतीहरू अहिले होटलमा केन्द्रित भएका छन् । ट्रक तथा मोटरसाइकल चालकहरूलाई जंगलमै यौन सम्पर्क गराउने युवतीहरू केही समययता होटल तथा लजहरूमा देखिन थालेको स्थानीयले बताएका छन् । जंगलमा असुरक्षा र प्रहरीको तारो बन्ने डरले उनीहरूको रोजाइमा होटल तथा लज परेको स्वयं उनीहरू बताउँछन् । चन्द्रपुरका कतिपय होटल तथा लजहरूले बाहिरबाट सम्पर्क गरी यौनकर्मीलाई बोलाएर व्यवसाय सञ्चालन गर्दै आएका छन् । उनीहरूले आर्थिक लाभ लिनका लागि बाहिरबाट युवती, महिला, किशोरीहरू बोलाएर यौन सम्पर्क गराउने गरेका छन् ।

इलाका प्रहरी कार्यलयले एक वर्ष पहिला होटलबाट युवायुवतीलाई नियन्त्रणमा लिई मुद्दा चलाइएको थियो । तर, हाल आएर प्रहरीले त्यसतर्फ ध्यान नदिएको सरोकारवाला बताउँछन् । यो समाचार आजको सौर्य दैनिकमा प्रकाशित छ । पछिल्लो समय एक समस्याका रूपमा यौन व्यवसाय देखापरेको स्थानीय बताउँछन् । प्रायः गरी दिनमा यौनकर्मीहरू समय तोकेर होटलमा बस्छन् । होटल तथा लज सञ्चालकहरूले मोबाइलमार्फत ग्राहक खोजेपछि यौनकर्मी बोलाउने गर्छन् । कतिपयले त कोठामा नै राखेर ग्राहकसँग मोलमोलाई गर्ने गर्छन् । त्यस्ता ग्राहकहरूले घण्टाको हिसाबमा पैसा दिन्छन् । यस्ता ग्राहकबाट होटल तथा लज सञ्चालकलाई धेरै मुनाफा हुन्छ । स्मार्ट सिटीको रूपमा अगाडि बढिरहेको चन्द्रपुरमा यौन व्यवसायका कारण बदनामी हुन थालेको बुद्धिजीवीहरूको भनाइ छ ।

उनीहरूले यसतर्फ प्रशासनले चासो देखाउनुपर्ने बताएका छन् । होटल व्यवसायी संघ, रौतहटका अध्यक्ष देवेन्द्र अर्यालले केही होटल तथा लजहरूमा यौन व्यवसाय हुने गरेको आफुले सुनेको बताए । उनले प्रहरीसँग समन्वय गरेर त्यस्ता होटल तथा लजहरूमा अनुगमन गर्ने र यौन क्रियाकलाप गरेको पाइएमा प्रहरीसमक्ष बुझाउने बताए । उनले कुनै होटलमा त्यस्तो गतिविधि भइरहेको भएमा तुरुन्त संघलाई वा प्रहरीलाई जानकारी दिन अनुरोध गरे ।