काठमाडौँ, २७ असोज । प्रधानमन्त्री शेरबहादुर देउवाले मन्त्रिपरिषद् विस्तारका लागि राष्ट्रपति कार्यालयमा आज पत्र पठाउनुभएको छ ।
राष्ट्रिय प्रजातन्त्र पार्टीका तर्फबाट अध्यक्ष कमल थापालाई उपप्रधानमन्त्री, जयन्त चन्द, दिलनाथ गिरी र विक्रम थापालाई मन्त्रीका लागि सिफारिस गरिएको पत्र राष्ट्रपति कार्यालयमा पठाइएको प्रधानमन्त्रीको निजी सचिवालय स्रोतले जनाएको छ ।
यसैगरी राज्यमन्त्रीमा कुन्तीकुमारी शाही, सुशीलकुमार श्रेष्ठ, भाष्कर भद्रा र कान्ता भट्टराईलाई सिफारिस गरिएको छ । राप्रपाले मन्त्रिपरिषद्मा सहभागी हुने नेताको नाम प्रधानमन्त्री देउवासमक्ष सिफारिस गरेको सो पार्टीका प्रवक्ता भुवन पाठकले जानकारी दिनुभयो । मन्त्रीहरुको शपथ कार्यक्रम शनिबार हुने भनिए पनि अहिलेसम्म शपथको कार्यक्रम तय नभएको राष्ट्रपति कार्यालयले जनाएको छ ।
प्रधानन्त्री देउवाले मन्त्री परिषद विस्तारका लागि राष्ट्रपति बिद्यादेवी भण्डारीलाई पत्र पठाएको भए पनि प्रधानमन्त्रीको मन्त्री परिषद विस्तारको तयारी राष्ट्रपतिमै निर्भर हुनेछ । राष्ट्रपति भण्डारीले मन्त्रीहरुलाई सपथ खुवाउन नमानेको खण्डमा मन्त्री परिषद विस्तार रोकिनेछ । निर्वाचन आचारसंहिता लागु भइसकेका र माओवादी मन्त्रीहरु यथावत रहेको अवस्थामा राष्ट्रपतिलाई मन्त्री परिषद विस्तारको पत्र सदर गराउन बाध्य बनाएर देउवा राष्ट्रपतिलाई अनुचित कार्यमा माध्य पार्न उद्धत रहेको एमाले, माओवादी लगायतका दलले आरोप लागएका छन् ।