पर्वत, २६ माघ ।  बजेट अभावका कारण यहाँको एक सामुदायिक विद्यालयको भवन निर्माण अलपत्र परेको छ । 

फलेवास नगरपालिका–४ मुडिकुवास्थित माटेदेवल व्यावसायिक तथा प्राविधिक माध्यमिक विद्यालयको भवन बजेट अभावका कारण विगत चार वर्षदेखि अलपत्र परेको हो । एक वर्षभित्रै सम्पन्न गर्नेगरी २०७१ मा निर्माण शुरु गरिएको सो विद्यालयको भवन अझैसम्म बन्न सकेको छैन । 

तत्कालीन शान्ति तथा पुनःनिर्माण मन्त्रालयको सहयोगमा निर्माण शुरु भएको दुई कोठे सो पक्की भवन अलपत्र रहँदा विद्यालयमा कक्षाको समस्या छ । आर्थिक वर्ष ०७१÷७२ मा शान्ति तथा पुनःनिर्माण मन्त्रालयले एक वर्षभित्रै सक्नेगरी विद्यालयको पक्की भवन निर्माण गर्ने सम्झौता गरेको थियो । 

सम्झौताअनुरूप पहिलो किस्ता रकम पठाएर बाँकी भुक्तानी नदिएपछि निर्माण कार्य रोकिएको सरोकारवालाको भनाइ छ । 

‘हामीले धेरैपटक सम्बन्धित निकायमा हारगुहार ग¥यौं,’ विद्यालय व्यवस्थापन समिति अध्यक्ष धनेश्वर रेग्मीले भन्नुभयो, “शुरुमा रु ६ लाख ल्याउन सकियो, त्यसपछि मन्त्रालय नै विघटनभयो, पैसा आउने कुरै भएन ।” 

विद्यालयको अरू स्रोत नभएकाले प्राप्त बजेटबाट हुने कामबाहेक अरू अगाडि बढाउन नसकेको उहाँले बताउनुभयो । भवनको जग, झ्याल–ढोका र गारो लगाएपछि बाँकी काम रोकिएको हो । निर्माणाधीन भवन अलपत्र परेपछि विद्यार्थीलाई चौर, नजिकैका चौतारा र बरण्डामा राखेर पढाउनु परिरहेको प्रधानाध्यापक रामप्रसाद रिजालले बताउनुभयो । 

विद्यालयले विगत ६ वर्षदेखि कक्षा ९ र १० तथा तीन वर्षदेखि कक्षा ११ र १२ मा समेत नियमितका अलावा प्राविधिक कृषि विज्ञानका कक्षा सञ्चालन गरेको छ । अतिरिक्त पढाइका लागि मात्रै विद्यालयलाई थप चार कोठा आवश्यक छ । “प्राविधिक विषयको पढाइले कोठा पुगेकै छैन”, प्रधानाध्यापक रामप्रसाद रिजालले भन्नुभयो, “विज्ञान प्रयोगशाला र अतिरिक्त कक्षा चलाउन बढी समस्या छ ।” 

कृषि विज्ञानतर्फ मात्रै हाल करीब एक सयको हाराहारीमा विद्यार्थी अध्ययनरत छन् । सामान्य र प्राविधिक्तर्फका सबै विद्यार्थीका लागि ४२ कक्षाकोठा आवश्यक छ । तर, विद्यालयसँग अहिले ३५ कोठा मात्रै छन । ‘हुरीबतास र वर्षाका बेला बाहिर बसेर पढ्दा समस्या हुन्छ,’ कक्षा ९ मा अध्ययनरत सविता शर्माले भन्नुभयो, “कक्षाकोठा र फर्निचर नभएपछि पढाइमै समस्या छ ।” विद्यालय प्रशासन र व्यवस्थापन समितिले सम्बन्धित निकायमा धेरै आग्रह गर्दा पनि निर्माणाधीन भवनको काम सूचारु गर्न नसकिएको अभिभावकले बताएका छन् । 

‘हामीले धेरैपटक सम्बन्धित निकायमा आग्रह ग¥यौं,’ व्यवस्थापन समितिका अध्यक्ष रेग्मीले भन्नुभयो, “शान्ति मन्त्रालयले शुरु गरेको हुनाले अब शिक्षाले हेर्न नमिल्ने रहेछ । अरु स्रोत जुटाउन समस्या छ ।” यो दुई कोठे भवन निर्माणमा हालसम्म करीब रु १२ लाख खर्च भइसकेको उहाँले जानकारी दिनुभयो । 

कृषितर्फको ‘बाली विज्ञान’ विषय माध्यमिक (कक्षा १२) सम्म अध्यापन हुने जिल्लाको एक मात्र यो विद्यालय हो । बाली विज्ञान अध्ययनका लागि निकै टाढा–टाढाबाट विद्यार्थी आउने भएकाले विद्यालयले नै छात्रावासको व्यवस्था गर्नुपर्छ । विद्यार्थीका अनुसार कोठा अभावमा क्षमताभन्दा धेरै विद्यार्थी एउटै कोठामा कोचिएर बस्नुपरेको गुनासो छ ।