काठमाडौं, २४ साउन । महानगरीय प्रहरी बृत्तले आफ्नो क्षेत्रमा अपराध नियन्त्रणका लागि व्यापक प्रहरी परिचालन गर्न थालेको छ । प्रहरी परिचालनसँगै शंकास्पद व्यक्तिहरुलाई दिनहुँ एक सयको हाराहारीमा पक्राउ पर्ने गरेका छन् ।

महानगरी प्रहरी बृत्त बौद्धका प्रमुख नायव उपरीक्षक श्याम कुमार राईको नेतृत्वमा खटिएको एक सयभन्दा बढी प्रहरीले गरेको अपरेशनका क्रममा शंकास्पद व्यक्ति पक्राउ परेका हुन् ।

पक्राउ परेकामध्ये कतिपय विभिन्न आपराधिक गतिविधिमा संलग्न रहेको पाइएको र थप अनुसन्धान गरिहरको जनाएको छ । चोरी, लुटपाट, डकैती, पकेटमारी जस्ता आपराधिक गतिविधि न्यून गर्नका लागि प्रहरीले लगातार काम गरिरहेको डीएसपी राईले बताउनुभयो ।

साउन २२ गते कपन क्षेत्रमा गरेको अपरेशनबाट १५७ जना नियन्त्रणमा लिएको थियो । अनुसन्धान र सोधपुछपछि १४९ जनालाई छाडिएको थियो भने आठजनामाथि थप अनुसन्धान भइरहेको जनाएको छ ।

त्यसैगरी प्रहरीले साउन २३ गते १०३ जनालाई नियन्त्रणमा लिएको थियो । नियन्त्रणमा लिएकामध्ये सात जनाबारे थप अनुसन्धान भइरहेको छ । ९६ जनालाई छाडिएको बौद्ध प्रहरीले जनाएको छ ।

जनता र प्रहरीबीचको सुमधुर सम्वन्ध स्थापित गर्दै अपराधमुक्त समाज निर्माण गर्दै जनतामा शान्ति सुरक्षाको प्रत्याभूति दिनका लागि प्रहरीले सक्रियताका साथ काम गरिरहेको डीएसपी राईको भनाइ छ ।