काठमाडौं, २ साउन । जिब्रोमुनि सुन लुकाएर ल्याउन तीनजना भारतीय नागरिकलाई प्रहरीले काठमाडौंस्थित अन्तर्राष्ट्रिय विमानस्थलबाट पक्राउ गरेको छ ।
शारजाहबाट आएको एयर अरेबियाको बिमानबाट जिब्रोमुनि सुन लुकाई ल्याएको अवस्थामा प्रहरीले पक्राउ गरेको हो । उनीहरुले कोटको टाँक जस्तो बनाएर जिब्रोमुनि लुकाई ल्याएको अवस्थामा सुन भेटिएको हो ।

पक्राउ पर्नेमा भारतीय नागरिक फैजान खान, साइद मोहम्मद काशिफ र अडिल रहेको त्रिभुवन अन्तर्राष्ट्रिय विमानस्थल प्रहरीका प्रवक्ता एसपी दिनेशराज मैनालीले जानकारी दिनुभयो ।

पक्राउ अभियुक्तको साथबाट दुई दुई थान टाँक जस्तो आकारमा लुकाई ल्याएको सुन बरामद भएको छ । करिब २७ लाख मूल्य बराबरको ५५९ ग्राम सुन रहेको प्रहरीले जनाएको छ ।

पक्राउ अभियुक्तहरुलाई आवश्यक कारवाहीका लागि त्रिभुवन अन्तर्राष्ट्रिय विमानस्थल भन्सार कार्यालयमा पठाएको छ ।