काठमाडौं, २५ असार । प्रदेश नं. ४ को नाम गण्डकी राखेको विरोधमा आदिवासी जनजातिहरुले काठमाडौंमा विरोध प्रदर्शन गरेका छन् ।

प्रदेश नं. ४ मा आदिवासी जनजातिको ऐतिहासिक थातथलो भएको भन्दै तमुवान मगरात नाम राख्न माग गरेको छ । नेपाल आदिवासी जनजाति महासंघको आव्हानमा भएको विरोध प्रदर्शनमा विभिन्न आदिवासी जनजाति अगुवाहरुले समेत गण्डकी प्रदेशको नाम खारेज गर्न माग गरेको छ ।

जनजाति महासंघका पूर्वमहासचिव डा. ओम गुरुङले गण्डकी प्रदेश कुनै पनि हालतमा स्वीकार्न नसकिने बताउनुभयो । उहाँले प्रदेशको नाम गण्डकी राखेर संघीयताकै धज्जी उडाउने काम गरेको भन्दै तमुवान मगरातको भावनाको सम्बोधन हुनुपर्ने बताउनुभयो ।

कार्यक्रममा किराँत याक्थुङ चुम्लुङका अध्यक्ष योगेन्द्र वनेमले लिम्बुवानबासीको तर्फबाट तमुवान मगरातको मागप्रति एक्येवद्धता रहेको स्पष्ट पार्नुभयो ।

त्यस्तै, नेवाः देय दवूका अध्यक्ष नरेश ताम्राकारले प्रदेशको नाम पहिचानका आधारमा हुनुपर्ने भन्दै तमुवान मगरातको पक्षमा सम्पूर्ण नेवार समुदाय रहेको बताउनुभयो ।

प्रदेश नं. ४ मा बसोबास गर्ने आदिवासी जनजातिको भावनामा गम्भीर चोट लागेको भन्दै आदिवासी जनजातिहरुले गण्डकी प्रदेशका विरुद्धमा निरन्तर आन्दोलन गर्ने चेतावनी दिएको छ ।