दुनै(डोल्पा) १७ असार । भित्ती–मोतीपुर सडकखण्ड अवरुद्ध भएपछि सर्वसाधारणहरु जोखिमपुर्ण यात्रा गर्न बाध्य भएकाछन् ।
ठुलीभेरी नगरपालिका अन्तर्गत बागडाँडामा पर्ने दश मिटर सडक पहिरोले पुरेपछि भित्ती–मोतीपुर सडक झन्डै तीनसाता देखि अवरुद्ध छ ।

बर्षातका कारण अवरुद्ध सडकखण्ड नखुलेपछि खसिरहेको पहिरोको मुनीको सानोबाटोबाट सर्वसाधारण जोखिमपुर्ण यात्रागर्न बाध्य छन् ।
सुँपानी देखि दुनैसम्म यातायात संञ्चालन गर्ने मुख्य सडकनै अवरुद्ध भएपछि सर्वसाधारणहरु भित्ती–जुफालसम्मको जोखिमपुर्ण सडकबाट गाडीको यात्रागर्न बाध्य भएको स्थानीयबासी अमर कठायतले बताए ।

सडक अवरुद्ध भएदेखि आन्तरिक रुपमा चल्दै आएका दर्जन धेरै जीपहरु यात्रुको ज्यान जोखिममा पार्दै नियमित यात्रुहरु ओसार पसार गरिरहेकाछन् ।
भित्ती– मोतीपुर सडकखण्ड संञ्चालनमा आउदा सजिलो सुरक्षित यात्रा हुने गरेतापनि सडक अवरुद्ध भएपछि भित्तीबाट जुफाल हुँदै पुनः मोतीपुर पुग्दा समय पनि धेरै लाग्ने र साँघुरो बाटोका कारण जोखिमपुर्ण यात्रागुर्नपर्ने बाध्यता रहेको गाडी चालक सुशिल कठायतले बताए । अवरुद्ध सडकका कारण डोल्पामा दैनिक उपभोग्य सामाग्री ओसार पसार गर्दै आएका घोडा खच्चडलाई पनि आवत आजवतमा समस्या उत्पन्न भएको छ । अवरुद्ध सडक खुलाउनकोलागि ठुलीभेरी नगरपालिकाले कुनै चासो नदिएको सर्वसाधारणको गुनासो छ ।
सुँपानी–दुनै जोड्ने मुख्य सडक भएतापनि अहिलेसम्म अवरुद्ध सडक खुलाउने तर्फ कुनैपनि निकायको ध्यान जान नसक्दा स्थानियबासीहरु जोखिमपुर्ण यात्रा गर्न बाध्य बनेका छन् ।