काठमाडौं, १ असार । अदालतले तोकेको ब्लडमनी तिर्न नसकेर साउदी अरबको जेलमा रहेका रोल्पाका दिलबहादुर घर्तीमगरलाई मृत्यदण्डबाट बचाउन बेलायत बसोबास गर्ने समाजसेवी तारा गुरुङले ५१ हजार रुपैयाँ सहयोग गर्नुभएको छ ।

समाजसेवी गुरुङले सो रकम दिलबहादुर घर्ती बचाउ अभियानका संयोजक दिपेश पुनलाई हस्तान्तरण गर्नुभयो ।

यसैगरी, जर्मनबाट समाजसेवी सानु गुरुङले दिलबहादुर घर्ती बचाउ अभियानका लागि १० हजार रुपैयाँ हस्तान्तरण गर्नुभएको छ ।

केही दिनअघि मात्र बेलायतस्थित राप्ती समाज यूकेको नेतृत्वमा आठ लाख ७५ हजार पाँच सय ५५ र पोर्तुगलमा रहेका नेपालीहरुबाट एक लाख ३९ हजार पाँच सय ४१ रुपियाँ संकलन भएको थियो ।

दिलबहादुरको जीवन रक्षाका लागि मूल समितिको नाममा खोलिएको खातामा २३ लाख भन्दा बढी रकम जम्मा भएको छ । दिलबहादुरको जीवन रक्षाका लागि झण्डै ६५ लाख आवश्यक पर्ने समितिले जनाएको छ ।
दिलबहादुरको जीवन रक्षाका लागि सहयोग रकम जम्मा गर्न अभियानका मूल समिति संयोजक दीपेश पुन, सचिव जीवन रोकामगर र दिलबहादुरकी पत्नी मनिका बुढामगरको नाममा नेपाल राष्ट्रिय बाणिज्य बैंक, बालाजु शाखामा ११९००२८६०७१० नं. को खाता खोलिएको अभियानले जानकारी गराएको छ ।