काठमाडौ २८ जेठ । नेपालमा मत्स्य क्षेत्रले राष्ट्रिय ग्राहस्थ उत्पादन जीडीपी०मा शून्य दशमलव ४४ प्रतिशत र कृषिको जीडीपीमा एक दशमलव ८३ प्रतिशत योगदान पुर्‍याउँदै आएको पाइएको छ । नदी, ताल तथा धानको खेतलगायतमा माछापालन गर्न सकिने अवस्था छ ।

मत्स्य उत्पादनको आर्थिक तथा सामाजिक पक्ष र जीविकोपार्जनका अतिरिक्त मानव स्वास्थ्यसँग महत्व रहेको विज्ञले बताएका छन् । मत्स्यपालन क्षेत्रलाई जोड दिएर किसानको आयस्तर बढाउन पहल गर्नुपर्ने सम्बन्धित निकाय र किसान अगुवाले बताएका छन् ।

दिगो विकासको लक्ष्य र कृषि विकास रणनीति र चालू आवधिक १६औँ योजनाको लक्ष्य हासिल गर्न पनि मत्स्य क्षेत्रको उत्पादन र उत्पादकत्व बढाउनुपर्ने खाँचो रहेको सरोकारवालाले बताएका छन् । मत्स्य क्षेत्रका सरोकारवाला निकाय र किसानबीच समन्वय तथा सहकार्यबारे नार्कको राष्ट्रिय पशु विज्ञान अनुसन्धान प्रतिष्ठान, खुमलटार ललितपुरले आज कार्यक्रम गरेको हो । कार्यक्रममा माछा व्यवसायको सम्भावना, उत्पादन र चुनौतीलगायतका विषयमा छलफल भयो ।

कार्यक्रममा माछापालन व्यवसायमा आवद्ध सिन्धुपाल्चोकका अगुवा किसान दिपक लामिछानेले माछापालन व्यवसायलाई सरकारले आवश्यक सहयोग नगरेको गुनासो समेत गर्नुभयो । कृषि तथा पशुसेवाका कार्यालयले प्रचार प्रसारका कार्यक्रम गर्दा गाईभैँसी, अन्य पशुचौपाया र कृषि उपजको प्रचार गर्ने गरेको भए पनि माछाको प्रचार र बजार सम्भावनाबारे जानकारी पुग्न नसकेको उहाँको भनाइ छ । जिउँदो माछा बोक्ने आधुनिक गाडीको व्यवस्था नहुन पनि समस्या रहेको अगुवा किसान लामिछानेले बताउनुभएको छ ।