काठमाडौँ ७ असार
— नेपालले विश्वकप छनोटमा बिहीबार वेस्ट इन्डिजविरुद्ध पहिला फिल्डिङ गर्ने निर्णय गरेको छ । जिम्बावेको हरारेको हरारे स्पोर्टस क्लबमा नेपालका कप्तान रोहित पौडेलले टस जितेपछि वेस्ट इन्डिजलाई ब्याटिङका लागि बोलाएका हुन् ।

नेपाली क्रिकेटमा यो सबैभन्दा बहुप्रतिक्षित खेल हो । नेपालले ५ वर्षअघि एकदिवसीय अन्तर्राष्ट्रिय मान्यता पाएपछि नेपालले टेस्ट राष्ट्रसँग खेल्न लागेको यो केवल दोस्रो खेल हो । यसै प्रतियोगितामा नेपालले जिम्बावेसँग खेलेको थियो । वेस्ट इन्डिजले १९७५ र १९७९ को पहिलो दुई संस्करणको विश्वकप जितेको थियो ।

अमेरिकाविरुद्ध खेलेको पछिल्लो खेलबाट नेपाली टोलीमा कुनै परिवर्तन गरिएको छैन । रोहितसहित नेपालबाट आसिफ शेख, कुशल भुर्तेल, भीम सार्की, कुशल मल्ल, आरिफ शेख, दीपेन्द्रसिंह ऐरी, गुल्शन झा, करण केसी, सन्दीप लामिछाने र ललित राजवंशी खेलिरहेका छन् ।

वेस्ट इन्डिजको टोलीमा पनि कुनै परिवर्तन छैन । साइ होपको कप्तानीमा रहेको वेस्ट इन्डिजबाट ब्रेन्डन किंग, केयल मायर्स, जोहनसन चार्ल्स, निकोलस पुरन, रोस्टन चेज, रोभमन पोवेल, जेसन होल्डर, किमो पाउल, अल्जारी जोसेफ, अकिल होसेन खेलिरहेका छन् ।

वेस्ट इन्डिजले पहिलो खेलमा अमेरिकालाई ३९ रनले पराजित गरेको थियो । पहिला ब्याटिङ गरेको वेस्ट इन्डिज ४९।३ ओभरमा २ सय ९७ रनमा अलआउट भएको थियो ।

नेपाल पहिलो खेलमा २ सय ९० रनमा अलआउट भए पनि घरेलु टोली जिम्बावेसँग ४५ ओभरभित्र ८ विकेटले पराजित भएको थियो । त्यसपछिको खेलमा अमेरिकालाई २ सय ७ रनमा अलआउट गर्दै नेपालले ६ विकेटको विजय हात पारेको थियो ।