काठमाडौं, ४ जेठ ।  माधव नेपाल नेतृत्वको एकीकृत समाजवादीले २५ हजारभन्दा बढी चन्दा दिने दाताको नाम र रकम आफ्नो लेखापरीक्षण प्रतिवेदनमा समावेश गरेको छ । तर, वास्तविक नाम नराखी छद्‌म नामबाट दाताको नाम उल्लेख गरेको पाइएको छ ।

नेकपा एसले आर्थिक वर्ष २०७८/०७९ को निर्वाचन आयोगमा बुझाएको लेखापरीक्षण प्रतिवेदनमा तनहुँका के श्रेष्ठले १ करोड, नेपालगन्जका एस बुढाले ५० लाख, ललितपुरका केजी महर्जनले ५० लाख र काठमाडौंका एबी तामाङले २८ लाख चन्दा दिएको उल्लेख छ ।

प्राविधिक जटिलताका कारण नाम पूरा उल्लेख नगरिएको बताउँछन् उपमहासचिव गंगालाल तुलाधर । ‘चन्दादाताहरू पार्टीकै शुभेच्छुकहरू हुनुनुहन्छ । तपाईंहरूले पनि अनुमान लगाउन सक्नुहुन्छ,’ उनले भने ।

नेकपा एसले प्रवासी नेपाली एकता मञ्चबाट ६२ लाख ६३ हजार ३४७ रुपैयाँ र पेसागत संगठनहरूबाट ६७ लाख ५२ हजार ५०० रुपैयाँ चन्दा लिएको छ । कांग्रेस, एमाले, माओवादीलगायतका दलहरूले भने चन्दाबाट संलन भएको रकम एकमुष्ट देखाए पनि कोबाट कति लिएको हो, उल्लेख गरेका छैनन् । तर नेकपा एसले चन्दा दिनेको छद्‌म नाम राखेको छ ।

७ करोड आम्दानी, ६ करोड खर्च

नेकपा एसले ७ करोड १५ लाख ९० हजार ३ सय ७७ रुपैयाँ आम्दानी गरेको छ । निर्वाचन आयोगमा बुझाएको लेखापरीक्षण प्रतिवेदनमा नेकपा एसले खर्च ६ करोड ५ लाख २९ हजार ५ सय २९ रुपैयाँ गरेको छ । खुद नाफा १ करोड १० लाख ६० हजार ८ सय ४८ रुपैयाँ गरेको छ ।

नेकपा एसको आम्दानीको स्रोत चन्दा, लेबी र प्रकाशन बिक्री रहेको छ । सदस्यता, लेबी र नवीकरण शुल्कबाट १ करोड ७८ लाख ३५ हजार ८२५ रुपैयाँ संकलन गरेको छ । चन्दा तथा सहयोगमा व्यक्तिगतबाट ३ करोड ९५ लाख ६२ हजार ५०० र संस्थाबाट १ करोड ३० लाख १५ हजार ८४७ रुपैयाँ संकलन गरेको छ ।

एकीकृत समाजवादीले सबैभन्दा धेरै खर्च चुनावमा गरेको छ । प्रतिवेदनमा चुनावमा २ करोड ९९ लाख ४४ हजार २६६ रुपैयाँ खर्च गरेको छ । प्रशिक्षणमा २८ लाख १५ हजार ६५७ रुपैयाँ कार्यालय सञ्चालनमा ९६ लाख ८५ हजार १०१ रुपैयाँ, प्रकाशनमा ४८ लाख ५० हजार २९५ रुपैयाँ खर्च भएको उल्लेख गरेको छ । पार्टीको प्रचारप्रसारमा ४० लाख खर्च गरेको छ ।

जग्गाजमिन र भवन छैन

सबैभन्दा धनी पार्टी एमालेबाट छुट्टिएर बनेको नेकपा एसले जग्गा जमिन जोडेको छैन । आयव्यय विवरणमा घरबहालमा २५ लाख ५० हजार खर्च गरेको जनाएको छ । ‘जग्गा जमिन जोडेको छैन । केपी ओलीलाई छोडेर आएका छौँ,’ उपमहासचिव तुलाधरले भने ।

विद्रोह गरेर आउने समयमा एमालेको खातामा २४ करोड पैसा रहेको र जग्गाजमिनमा आफूहरूको पनि दाबी लाग्ने उनी बताउँछन् । ‘कानुनी रूपमा अदालत जानुपर्ने हुन्छ । देशैभर रहेको सम्पत्तिमा हाम्रो पनि हक आउँछ । तर, अदालत जानेभन्दा पनि एमालेको ठूलो सदस्यलाई हाम्रोमा ल्याएर सदस्यहरूको शक्ति र आडमा जग्गाजमिन र भवन जोड्छौँ,’ उनले भने, ‘जिरोबाट उठ्ने कसम खाएर इच्छाशक्ति लिएका छौँ ।’