काठमाडौं, २२ असार । अर्थमन्त्री जनार्दन शर्माबारे संसदीय छानबिन गर्न समिति गठन गर्ने सहमति भएको छ।सत्तारूढ र प्रतिपक्षी दलहरूबीच आज बानेश्वरस्थित संघीय संसद भवनमा भएको छलफलअनुसार संसदीय छानबिन समिति गठन गर्ने समझदारी बनेको छ।अर्थमन्त्री जनार्दन शर्माले अनधिकृत व्यक्ति लगेर करका दर हेरफेर गरेको आरोप छ।

संसदीय छानबिन समितिमा प्रमुख प्रतिपक्षी नेकपा एमालेबाट चार जना सांसद रहनेछन्।नेपाली कांग्रेसबाट २ र नेकपा माओवादी केन्द्रबाट दुई सदस्य रहनेछन्। यस्तै नेकपा एकीकृत समाजवादी, जसपा र लोसपाबाट एक/एक जना सदस्य गरी कूल ११ सदस्यीय संसदीय छानबिन गठन गर्ने सहमति भएको हो।

एमाले प्रमुख सचेतक विशाल भट्टराईले संसदीय छानबिन समिति गठन गर्ने सहमति भएको बताए। समितिमा को-को सदस्य छन् भन्ने प्रतिनिधि सभा बैठकमा सभामुखले जानकारी दिनेछन्। अर्थमन्त्री हुँदा विवादमा परेपछि भरतमोहन र विष्णु पौडेलमाथि संसदीय समितिले छानबिन गरेको थियो ।