काठमाडौं, १२ जेठ ।  प्रदेश सांसदबाट राजीनामा दिएर स्थानीय तहको चुनावमा मेयर उम्मेदवार भएका ८ जनामध्ये ६ जना पराजित भएका छन्।प्रदेश १ को प्रदेशसभाबाट राजीनामा दिएका २ मध्ये एक जना पराजित भए भने एक जनाले जित हात पारे। प्रदेश सांसदबाट राजीनामा दिएर इलामको सूर्योदय नगरपालिकाको प्रमुखमा उम्मेदवारी दिएका नेकपा एमालेका नेता काजिमान कागते पराजित भए। उनी नेकपा एकीकृत समाजवादीका उम्मेद्वार पूर्व प्रमुख रणबहादुर राईसँग ।  यता प्रदेश सभाबाट राजीनामा दिएका गोपालचन्द्र बुढाथोकी भने मेयरमा निर्वाचित भए। झापाको मेचीनगर नगरपालिकाका उम्मेदवारी दिएका बुढाथोकीले विजयी भए। उनका निकटतम प्रतिस्पर्धी गठबन्धनका तर्फबाट नेपाली कांग्रेसका इन्द्रबहादुर बुढाथोकी पराजीत बने।

यस्तै मधेश प्रदेशबाट राजीनामा दिएर मेयरमा उम्मेदवारी दिएका दुबै जना पराजित भए।प्रदेश सांसदबाट राजीनामा दिएका उपेन्द्रप्रसाद कुशवाहा र शेख अबुलकलाम आजाद दुबै जना मेयर पदमा परजित भए। सर्लाहीको गोडैताको मेयरमा उम्मेदवारी दिएका उपेन्द्रप्रसाद कुशवाहा लोकतान्त्रिक समाजवादी पार्टी (लोसपा) का देवेन्द्रकुमार यादवसँग पराजित भए। मधेश प्रदेशकै प्रदेशसभा सदस्यबाट राजीनामा दिएर रौतहटको गढीमाई नगरपालिकाको मेयर पदमा उम्मेदवारी दिएका शेख अबुलकलाम आजाद पनि पराजित भएका छन्।

यस्तै बागमती प्रदेश सभाबाट राजीनामा दिएर दुई महानगरको मेयरमा उम्मेदवारी दिएका दुई जनामध्ये १ जना पराजित भइसके भने अर्का एक पराजउन्मुख छन्।प्रदेश सांसदबाट राजीनामा दिएर भरतपुर महानगरपालिकाको मेयरमा उम्मेदवारी दिएका एमालेका विजय सुवेदी पराजित भए।

उनी सत्ता गठबन्धनको साझा उम्मेदवार नेकपा माओवादी केन्द्रकी रेनु दाहालसँग पराजित भए।यस्तै प्रदेशसभाबाटै राजीनामा दिएर काठमाडौं महानगरपालिकाको मेयरमा उम्मेदवारी दिएका केशव स्थापित पनि पराजयउन्मुख छन्।
गण्डकी प्रदेश सभा सदस्यबाट राजीनामा दिएर महानगरको मेयरमा उम्मेद्वार बनेका कृष्ण थापा नेकपा एकीकृत समाजवादीका धनराज आचार्यसँग पराजित भए।यता लुम्बिनी प्रदेशसभाबाट राजीनामा दिएका दिपेश थारूले भने बर्दियाको राजापुर नगरपालिकाको मेयर जितेका छन्।