काठमाडौं । नवगठित नेकपा (एकीकृत समाजवादी) पार्टीका अध्यक्ष माधवकुमार नेपालले कार्यकर्ताहरूलाई आफ्नो पार्टीमा समाहित हुन आग्रह गर्नुभएको छ । नेकपा एकीकृत समाजवादीले निर्वाचन आयोगबाट मान्यता पाएपछि पहिलोपटक बिहीबार आयोजना गरेको पत्रकार सम्मेलनमा नेता नेपालले एमाले अध्यक्ष केपी शर्मा ओलीलाई भने दक्षिणपन्थी भासमा फसेको र प्रतिगामी कदम चालेको आरोप लगाउनुभयो ।

ओली दक्षिणपन्थी भासमा फसिसकेको, सरकार संचालनमा असफल भइसकेको, एकीकृत कम्युनिष्ट पार्टी विभाजनमा अग्रसरता लिएको भन्दै नेपालले दुई–दुई पटक प्रतिनिधिसभा विघटन गरि प्रतिगामी कदम चालेको मान्छेको भ्रमबाट मुक्त भएर नया क्रान्तिकारी धारमा समाहित हुन आग्रह गर्नुभयो । हजारौं कार्यकर्ता र जनप्रतिनिधिको सुरक्षा सुनिश्चित गर्न नया पार्टी खोल्न ढिलाइ गरेका नेता नेपालको स्पष्टीकरण थियो । हजारौं हजार कार्यकर्ताको सुरक्षाका बारेमा सोच्नुपर्ने हुन्थ्यो भन्दै नेपालले संघ, प्रदेश र स्थानीय तहमा निर्वाचित भएका कार्यकर्ताको भविष्यको चिन्ता गर्ने भएकाले आफूहरुले तत्कालै नया पार्टी नखोलेको दावी गर्नुभयो । पछिल्लो समय त्यसको सुनिश्चित हुने गरी संवैधानिक अनुकूलता प्राप्त भएपछि नया दल खोलेको उहाको भनाइ छ ।

अहिले परिस्थितिमा परिवर्तन भएको र आफूहरुका लागि मात्रै नभएर अरुका लागि पनि आवश्यक परेकाले नया दल खोल्न संवैधानिक अनुकूलता प्राप्त भएको उहाको भनाइ थियो । नेपालले आफ्नो साथ छोडेका साथीहरूले पहिले नै हतारिएर नया पार्टी दर्ता गरेको पनि खुलासा पनि गर्नुभयो । हाम्रो साथ छोडेका साथीहरुले निर्वाचन आयोगमा दर्ता गरेको पार्टी अहिले पनि आयोगमा जिउदै छ चन्दै नेपालले साथ नदिएकामा आफ्नै समूहका नेताहरूप्रति खासै गुनासो नभएको समेत बताउनुभयो ।