काठमाडौं । सन् २०२० मा विदेशी पर्यटकको आगमन ८० प्रतिशतले घटेको छ । विदेशी पर्यटकका लागि नेपाल खुला गरिएको ६९ वर्षयता विश्वव्यापी रुपमा परेको कोरोना प्रभावले घटेको हो । संस्कृति, पर्यटन तथा नागरिक उड्डयन मन्त्रालयले कोभिड संक्रमणका कारण गत वर्ष २ लाख ३० हजार ८५ जना मात्रै विदेशी पर्यटक नेपाल आएको जनाएको छ ।

यो सन् २०१९ को तुलनामा ८० दशमलव ७ प्रतिशत कम हो । हवाई मार्ग तथा स्थल मार्ग हु“दै सन् २०१९ मा नेपालमा ११ लाख ९७ हजार १ सय ९१ जना विदेशी नेपाल आएका थिए । नेपाल विदेशी पर्यटकका लागि सन् १९५१ देखि खुला गरिएको थियो । अघिल्लो वर्षको जसरी यसअघिका कुनै पनि वर्ष पर्यटन आगमनमा गिरावट नआएको मन्त्रालयले जनाएको छ । नेपालले विदेशी पर्यटकको रेकर्ड सन् १९६४ देखि राख्न थालेको हो । त्यस वर्ष ९ हजार ५ सय २६ जना विदेशी नेपाल घुम्न आएका थिए । यो त्यसअघिको वर्षको दा“जोमा ३० प्रतिशतले वृद्धि थियो । पछिल्लोपटक नेपालमा सन् २०१५ मा ३२ प्रतिशत पर्यटक आगमन घटेको थियो । ‘सन् २०२० मा नेपाल करिब बन्द थियो, अनलाइन भिसा रोकिएका थिए, त्यस्तो बेला १० दिने क्वारेन्टाइन बस्न इच्छुक हुदै नेपाल आउने विदेशीको संख्या २ लाख पुग्नुले नेपालमा पर्यटकको सम्भावनाको संकेत गरेको बुझन सकिन्छ । सन् २०२० मा नेपालले विदेशी पर्यटक आगमनबाट २५ अर्ब ७८ करोड रुपैया आम्दानी गरेको थियो  यो अघिल्लो वर्षको तुलनामा ७० प्रतिशत कम हो ।

सन् २०२० मा सर्वाधिक पर्यटक आगमन भएका मुलुकमा भारत, म्यानमार, थाइल्यान्ड, चीन र संयुक्त राज्य अमेरिका प्रमुख थिए ।