काठमाडौं, ३ असार । नेकपा एमाले स्थायी कमिटी सदस्य प्रदीप ज्ञवालीले पार्टीका वरिष्ठ नेता माधवकुमार नेपाल बेग्लै कोर्समा हिँड्न चाहेको बताउनुभयो। एमाले एकताका लागि १० बुँदे सहमति जुटाएको कार्यदलमा रहेका ज्ञवालीसहितका नेताहरुले आइतबार विहान वरिष्ठ नेता नेपाललाई भेटवार्ता गर्नुभएको थियो । भेटमा विश्वासको मत लिने प्रधानमन्त्री शेरबहादुर देउवाको तयारीबारे छलफल भएको थियो । नेता नेपालले एउटा विन्दुमा पुसिकेको हुनाले आफूले देउवालाई मत दिने बताउनुभएको ज्ञवालीले बताउनुभयो ।
नेपाल समूहबाट कार्यदलमा रहेका नेताहरुले सहमतिअनुसार जे गर्दा पनि संस्थागत रुपमा निर्णय गर्नुपर्ने बताएका थिए । ‘उहाँले आफू बहुमतमा नभएको कमिटी, अल्पमतमा भएको कमिटीमा गएर त्यसको निर्णयलाई मान्न नसकिने कुरा पनि गर्नुभयो ।
यसको तात्पर्य पार्टीलाई एकतावद्ध बनाएर लैजान उहाँ इच्छुक हुनुहन्न भन्ने देखियो’, स्थायी कमिटीको बैठकपछि ज्ञवालीले भने, ‘उहाँ बेग्लै कोर्समा हिँड्न चाहनुभएको देखियो ।’ ज्ञवालीले भन्नुभयो । यद्यपि नेता नेपाललाई रोक्न उहाँ पक्षका नेताहरुले अहिले पनि प्रयत्न गरिरहनुभएको छ । ‘उहाँको टिममा रहेका साथीहरुले त्यसरी जानु उपयुक्त हुँदैन, १० बुँदे भइसकेपछि संस्थागत निर्णय बेगर जान मिल्दैन । तपाईंले हामीसँग पनि सोध्नु भएको छैन । तपाईंको आफ्नो मत हो । शेरबहादुरलाई प्रधानमन्त्री बनाउन र आन्दोलनलाई उनको सेवामा अर्पित गर्ने हाम्रो सहमति भएको होइन भन्नुभयो’ ज्ञवालीले भने, ‘उहाँहरुको प्रयासमा कुनै परिणाम आयो भने बेग्लै कुरा हो । अन्यथा माधवकुमार नेपाल एउटा निष्कर्षमा पुग्नु भएको हामीले देख्यौं ।’
प्रतिक्रिया दिनुहोस्