काठमाडौं, ३० असार । नेकपा एमालेका उपाध्यक्ष डा. भीमबहादुर रावलले पार्टी विभाजन रोक्ने प्रयास नगर्न आफूलाई धम्कीपूर्ण फोन आएको बताउनुभयो । उहाँले कार्यदलमा एमाले विभाजन रोक्ने प्रयास नगर्न आफूलाई केही राजनीतिक दलका नेताहरुबाट दबाब र धम्कीपूर्ण टेलिफोन आएको बताउनुभएको हो । बुधबार विज्ञप्ति जारी गर्दै रावलले भन्नुभयो एमाले कतै विभाजनबाट रोकिने पो हो कि भनेर कतिपयलाई देखिने र बुझिने गरी लागिरहेको रिंगाटाको पर्दा उघारीदिउँ कि जस्तो पो लाग्छ ।’ एमाले कार्यदलले असार २७ गते राति पार्टी एकताको सहमति गरेको थियो । माधव नेपाल समूहका नेता रावलको ओलीसँग निकटता बढेको र उहाँले पदकै लागि कार्यदलमा सहमति गरेको भन्दै टिप्पणी भइरहेका छन् । तर उहाँले आफ्नो चरित्र हत्या गर्न भ्रामक समाचार प्रकाशित गरिएको समेत बताउनुभएको छ । एमाले नेता रावलले २० असारमा पार्टी अध्यक्ष केपी शर्मा ओलीसँग बालुवाटारमा भेटेको कुरा वरिष्ठ नेता नेपाल र रघुजी पन्तलाई जानकारी गराएको विज्ञप्तिमा उल्लेख गर्नुभएको छ । उहाँले ओलीसँगको भेटमा पदका बारेमा छलफल नै नभएको बताउनुभएको छ ।