काठमाडौँ, १४ माघ । प्रधानमन्त्री केपी शर्मा ओलीले कोरोना खोप कार्यक्रम निरीक्षण गर्न उपत्यकाका विभिन्न अस्पतालमा पुग्नु भएको छ । प्रधानमन्त्रीका प्रेस सल्लाहाकार सूर्य थापाका अनुसार ओली त्रिवि शिक्षण अस्पताल, नेपाल प्रहरी अस्पताल, वीरेन्द्र सैनिक अस्पताल र पाटन स्वास्थ्य विज्ञान प्रतिष्ठान लगायतका अस्पताल पुगेर खोप कार्यक्रम अवलोकन गर्नुभएको हो ।

पाटन स्वास्थ्य विज्ञान प्रतिष्ठानका अस्पताल निर्देशक डा.रवी शाक्यका अनुसार प्रधानमन्त्री ओलीले खोप लगाएको निरीक्षण गरेपनि कुनै प्रतिक्रिया भने दिनु भएन । उहाँका अनुसार प्रधानमन्त्री ओलीलाई केही बोल्न आग्रह गरिएपनि उहाले खोप लगाउनका लागि गरिएको व्यवस्था राम्रो रहेछ । के कसरी गर्नुपर्छ तपाईंहरु आफैं जानकार हुनुहुन्छ भन्दै शुभकामना दिएर निस्कनु भयो । बुधबारदेखि सरकारले देशव्यापी रुपमा कोरोनाविरुद्धको खोप अभियान सुरु गरेको छ । पहिलो चरणको अभियान अन्तरगत देशभरका स्वास्थ्यकर्मी लगायत अग्रपंक्तिमा रहेर कोरोना विरुद्ध कार्यरतहरुलाई खोप दिइँदैछ ।