बागलुङ , २२ असोज  । बागलुङ नगरपालिकाले बागलुङ बजार भित्र सिसि क्यामेरा ब्यबस्थापन गर्ने कार्यमा चासो नदेखाउदा बागलुङ बजारभित्र चोरी र अपराधका घटनाहरू बढेर गएको छ ।

बागलुङ बजारको शान्ति सुरक्षालाई मध्यनजर गरी बजारका विभिन्न चोकहरुमा जडान गरिएका सिसी क्यामेरा प्रयोग बिहिन बनेका छन् । आवश्यक मर्मत सम्भारको अभावमा ७ वर्ष अगाडि उद्योग बाणिज्य संघ बागलुङको पहलमा वजारका विभिन्न चोकमा जडान गरिएका २९ सिसी क्यामेरा मर्मत हुन नसक्दा सिसी क्यमेरा प्रयोग बिहिन बनेका हुन् । बढ्दो शहरीकरण संगै समाजमा अपराध तथा चोरीका घटना बढ्दै गएको समयमा नगरलाई सुरक्षित बनाउन गरिएको काम प्रभावकारी भएको छैन । जिल्ला प्रहरी कार्यालय बागलुङमा कन्ट्रोल रुम राखी व्यवसायीक महत्वका चोकहरुमा सिसी क्यामेरा जडान गरिएको थियो ।
बागलुङ नगरपालिका भित्र जडान गरिएका सिसि क्यामेरा बिग्रिएर काम दिन छाडेपछि बजारमा केही समय यता चोरी र अपराधका घटना बढेर गएका छन । यहीँ हप्ता मात्र बागलुङ बजारको मुख्य चोक बाट एकजना पेन्सन बुझ्न आएकी बृद्ध महिलाको ९ तोला सुन फिल्मी शैलीमा चोरी भएको छ ।
यस अघिका घटनामा प्रहरीले सिसि क्यामेराको सहायतामा चोरी र अपराधि गर्ने तत्काल पक्राउ पर्ने गरेपनि हाल सिसि क्यामेरा विग्रिएको कारण समस्या भएको छ । बजारमा जडान गरिएका सिसि क्यामेरा बागलुङ नगरपालिका भित्र पुरानो बिधुत टेलिकमका पोल र तारहरू संगै बिस्ताफित भएपछि बजारमा चोरी र अपराधका घटना बढेर गएपछि जिल्ला प्रहरी कार्यालयलाई चोरी गर्ने अपराध गर्ने ब्यक्तिलाई पक्राउ गर्न चुनौती थपिन पुगेको जिल्ला प्रहरी कार्यालयका सुचना अधिकृत राजेन्द्र रेग्मीले बताउनुभयो । बागलुङ नगरपालिका र बागलुङ उद्योग बाणिज्य संघ बिच भएको सार्वजनिक निजी साझेदारी कार्यक्रम बागलुङ बजारको शान्ति सुरक्षा कायम राख्न सिसि क्यामेरा जडान गर्ने सहमति अनुसार नगरपालिकाले दिनुपर्ने रकम नदिएपछि सिसि क्यामेरा ब्यबस्थापनको काम अलपत्र परेको बागलुङ उद्योग बाणिज्य संघले जनाएको छ । वजेट अभावमा मर्मत गर्न नसकिएको कारण वजारमा भएको क्यामेरा निकालेर उद्योग वाणिज्य संघमा ल्याएर राख्न वाध्य भएको बागलुङ उद्योग बाणिज्य संघका निर्वतमान अध्यक्ष जयराम भारीले बताउनुभयो ।
बागलुङ उद्योग बाणिज्य संघ र नगरपालिका बिच साझेदारी कार्यक्रम अनुसार ब्यबसायीले नगरपालिकालाई बुझाउने ब्यबसाय कर बापतको ३० प्रतिशत भुक्तानी २ बर्ष देखि नदिएको कारण सिसि क्यामेरा जडान देखि मर्मत संभार गर्ने योजना अगाडि बढ्न नसकेको जनाईएको छ ।
बागलुङ बजार भित्र लथालिङ्ग रूपमा तागिएका तार पुरानो पोल फेर्ने अभियान चलिरहेको कारणले अब केही समय भित्र सिसि क्यामेरा जडान गर्ने काम अघि बढ्ने बागलुङ नगरपालिकाका वडा अध्यक्ष जीवन आचार्यले बताउनुभयो । सिसी क्यामेराको जडानपछि बजारमा भएका केही चोरीका घटनाहरुमा समेत दोषी पत्ता लगाउन सहज भएको थियो । तर अहिले क्यामेराले काम गर्न छाडेपछि समस्या भएको छ । बजारको विभिन्न क्षेत्रमा तथा मुख्य प्रवेश क्षेत्रमा जडान भएका क्यामेराले काम गर्न छोडे पछि चाडपर्व संगै अन्य समयमा हुने चोरी, डकैती जस्ता अपराध जन्य गतिविधि रोकथाम र अनुसन्धानमा समस्या हुनसक्ने सरोकारवाला निकायले गुनासो गरेका छन् ।