इंग्लिस प्रिमियर लिगमा आज पाँच खेल हुने



काठमाडौं, २० असार । इंग्लिस प्रिमियर लिग फुटबल अन्तर्गत आज (शनिबार) पाँच खेल हुँदैछ ।
प्रिमियर लिगमा शनिबार चेल्सी, म्यानचेस्टर युनाइटेड, आर्सनल, लेष्टर सिटी लगायतका क्लबले प्रतिस्पर्धा गर्ने छन् । शीर्ष तीनका लागि प्रतिस्पर्धा गरिरहेको चेल्सीले घरेलु मैदानमा वाट्फोर्डसँग खेल्नेछ । स्टामफोर्ड ब्रिजमा हुने चेल्सी र वाट्फोर्डबीचको खेल राति १२ ः४५ बजे सुरु हुनेछ । घरेलु मैदानमा चेल्सी जित निकाल्दै शीर्ष तीनको यात्रालाई कायम राख्न चाहन्छ । चौंथो स्थानको चेल्सी तेस्रो स्थानको लेष्टर सिटी भन्दा एक अंकले पछि रहेको छ । अघिल्लो खेलमा वेष्ट ब्रमसँग पराजित भएपछि चेल्सीले शीर्ष तीनमा उक्लने मौका गुमाएको थियो । चेल्सीले ३२ खेलमा ५४ अंक जोडेको छ । लेष्टरको ५५ अंक रहेको छ । वाट्फोर्ड २८ अंकसहित लिगको १७ औं स्थानमा रहेको छ । शनिबार लेष्टर पराजित वा बराबरीमा रोकिएको खण्डमा र वाट्फोर्डलाई हराएमा चेल्सी तेस्रो स्थानमा उक्लनेछ । लेष्टरले घरेलु मैदानमा क्रिस्टल प्यालेससँग खेल्नेछ । खेल बेलुका ७स्४५ बजे सुरु हुनेछ । क्रिस्टल ४२ अंक जोडेर लिगको १२ औं स्थानमा रहेको छ । यस्तै युनाइटेडले घरेलु मैदानमा बर्नेमाउथसँग खेल्नेछ । दुई टोलीबीचको खेल बेलुका ७ः४५ बजे सुरु हुनेछ । घरेलु मैदानमा जित निकाल्दै युनाइटेड शीर्ष चारमा रहेको टोलीविरुद्ध अंक दुरी कम गर्न चाहन्छ । पांचौं स्थानमा रहेको युनाइटेडको ५२ अंक रहेको छ । बर्नेमाउथ २७ अंक जोडेर रेलिगेसन क्षेत्रमा रहेको छ । आर्सनलले उल्भ्ससँग उसैको मैदानमा खेल्नेछ । दुई टिमबीचको खेल राति १०ः१५ बजे सुरु हुनेछ । दुवै टिम जित निकाल्ने लक्ष्यमा हुनेछन् । अर्को खेलमा नर्विच सिटीले ब्राइटनसंग खेल्नेछ ।

    Comment Here!


सम्बन्धित समाचार

View All