काठमाडौं, १६ जेठ । आर्थिक वर्ष २०७७/०७८ को निम्ति सरकारले ल्याएको बजेट आम सञ्चार क्षेत्रको निम्ति सकारात्मक भएको भन्दै सरोकारवालले स्वागत गरेका छन् ।

शुक्रबार नेपाल मिडिया सोसाइटी, ब्रोडकाष्टिङ एसोसिएसन अफ नेपाल (बान) र सामुदायिक रेडियो प्रसारक संघ (अकोराव ) ले संयुक्त रुपमा विज्ञप्ती जारी गरी बजेटले आमसञ्चार क्षेत्रले माग गर्दै आएका केही विषय सम्वोधन भएकोमा स्वागत गरेका हुन् । विज्ञप्तीमा बजेटमार्फत् आमसञ्चारमाध्यमको कारोबारको दुई प्रतिशत सेवाशुल्क मध्ये १ प्रतिशत कायम गरिनु र आगामी आर्थिक वर्षमा टेलिभिजन र रेडियोको लाइसेन्स तथा उपकरण नवीकरण शुल्कमापूर्ण छुट दिने व्यवस्था मिलाएकोमा अर्थ मन्त्रालयलाई धन्यवाद ज्ञापन गरिएको छ ।

विभिन्न कारणले नवीकरण हुन नसकेका प्रसारण संस्थालाई ०७७ पुस मसान्तसम्म विना जरिवना नवीकरण गर्न पाउने सुविधा तथा स्थानीय रुपमा सञ्चालनमा रहेका प्रसारण संस्थालाई राज्यकातर्फबाट प्रवर्धन गर्ने नीति प्रशंशनीय रहेको विज्ञप्तीमा उल्लेख गरिएको छ ।

त्यसैगरी बजेट वक्तव्यमा उल्लेख भएको र अर्थ विधेयक तथा अर्थ मन्त्रालयमामार्फत गरिनुपर्ने कतिपय विषय अस्पष्ट रहेको उल्लेख गर्दै त्यसलाई स्पष्ट गरी नेपाली आमसञ्चार माध्यम सञ्चालनका लागि सहजीकरण गरिदिनेमा विश्वास व्यक्त गरेका छन् । त्यस्तै, बजेट प्रस्तुत हुनुभन्दा अघि संयुक्त रुपमा पेश गरेका मागहरु मध्ये अन्य मागहरुलाई मन्त्रालय र अन्य सरोकारवाला निकायहरुबाट कार्यान्वयनमा ल्याइदिन पनि अर्थमन्त्रीको ध्यानाकर्षण गराईएको छ ।