सिरहा, ८  माघ । जनतालाई युग सुहाउँदो सेवा दिन र प्रविधिमैत्री सरकार सञ्चालन गर्न भन्दै स्थानीय तहले वेबसाइट बनाएका छन् । आफ्ना गतिविधिलाई पारदर्शी, सेवामूलक र जानकारीमूलक बनाउन सबै सामग्री अपलोड गर्ने लक्ष्यका साथ स्थानीय तहमा सूचना प्रविधि अधिकृतको समेत व्यवस्था गरिएको छ । यद्यपि, अधिकांश स्थानीय तहले आफ्ना सबै विवरण वेबसाइटमा राखेका छैनन् ।

जिल्ला सिरहाका १७ वटै स्थानीय तहले विभिन्न प्रतिवेदन, विद्युतीय सुशासन र सूचना तथा जानकारीमूलक विवरण उल्लेख गरेका छैनन् । बरु, कतिपय स्थानीय तहले आफ्नो वेबसाइटमा अढाई वर्षअघि निर्वाचित जनप्रतिनिधिको विवरण र बोलपत्र आह्वान गरेका विज्ञापन मात्र राखेका छन् ।

आफूहरूलाई चाहिने मुख्य विवरण नै लुकाउने गरेको सेवाग्रहीको गुनासो छ । स्थानीय तहका अनलाइनमा जनतालाई आवश्यक पर्ने जानकारीमूलक सामग्री नराखिएको बरियारपट्टि गाउँपालिकाका युवा निरज यादवले बताए । उनले भने, ‘वेबसाइटमा विवरण नराख्नु जनतालाई सीधै ठग्नु हो ।’ सामान्य विवरणसमेत गाउँपालिकाको वेबसाइटमा नभेटिएको सानु बस्नेतको गुनासो छ । ‘गाउँगाउँमा इन्टरनेटको पहुँच सहज भएका वेला व्यक्तिगत घटना दर्ता, स्थानीय तहका मासिक, चौमासिक र वार्षिक प्रगति विवरण, खर्च तथा आम्दानीका विवरण अनलाइनमा नियमित अद्यावधिक हुनुपर्नेमा त्यस्तो पाइँदैन,’ उनले भने ।

कर्मचारी विवरणले भरिएका छन् वेबसाइट सिरहा नगरपालिकासहित सिरहामा १७ वटा स्थानीय तह छन् । ८ वटा नगरपालिका र ९ वटा गाँउपालिकाको वेबसाइटमा कर्मचारी र जनप्रतिनिधिको विवरण मात्र पाइने गरेको छ । स्थानीय तहका वेबपेजका मुख्य मेनुअन्तर्गत गृहपृष्ठ, परिचय, कर्मचारी, कार्यक्रम तथा परियोजना, प्रतिवेदन, विद्युतीय सुशासन सेवा, सूचना तथा जानकारी, विषयगत शाखा, ऐन, नियम, स्थानीय राजपत्र आदि समावेश छन् । मुख्य मेनुअन्तर्गत विभिन्न सहायक मेनु राखिएका छन् । त्यस्तै, वेबसाइटमा निर्वाचित वडाध्यक्ष तथा वडा सदस्यहरूको विवरण देख्न सकिन्छ । वेबपेजमा वडागत प्रोफाइल विवरण, सामाजिक सुरक्षा, मासिक, चौमासिक र वार्षिक प्रगति प्रतिवेदनलगायतका विवरण समावेश गर्ने भनिए पनि ती पूर्ण छैनन् ।