काठमाडौं, १ माघ । ‘राष्ट्रिय एकता योगको सान्दर्भिकता’ नारासहित बुधबार योग दिवस मनाइएको छ । कार्यक्रममा परराष्ट्रमन्त्री प्रदीपकुमार ज्ञवालीले योग शिक्षा गौरवपूर्ण परम्परा र सम्पदा भएको बताउनुभयो । विज्ञान र प्रविधिको विकास नहुँदा योगको विकास भएको बताउँदै उहाँले यो गौरवपूर्ण परम्परा र सम्पदा भएको बताउनुभयो ।

राष्ट्रिय योग दिवसका अवसरमा राजधानीमा भएको कार्यक्रममा मन्त्री ज्ञवालीले अग्रजहरूले योगका माध्यमबाट स्वस्थ जीवन बाँच्ने र धेरै महत्त्वपूर्ण सम्पदा तथा ज्ञान हस्तान्तरण गरेर गएको बताउनुभयो । ‘‘आधुनिक विज्ञान, प्रविधि नभएको बेला, आधुनिक मेडिकल विज्ञानको विकास भएको थिएन । जतिबेला डाइग्नोस्टिक र ट्रिटमेन्टका लागि अहिलेजस्तो सहज सुलभ प्रविधिहरू थिएनन् । हाम्रा अग्रजहरूले योगका माध्यमबाट स्वस्थ जीवन बाँच्ने र अरू धेरै महत्त्वपूर्ण सम्पदा र ज्ञान हस्तान्तरण गरेर गए,’ उहाँले भन्नुभययो ।

‘विभिन्न किसिमका तनावलाई ध्यानले कम गर्न सक्छ । प्रभावकारी छ । यो गौरवपूर्ण धरोहरलाई विद्यालय शिक्षसँगै जोडेर जीवनको अभिन्न अंग बनाउनुपर्छ ।’’
सोही कार्यक्रममा स्वास्थ्य तथा जनसंख्यामन्त्री भानुभक्त ढकालले योगको माध्यमबाट मान्छेमा सकारात्मक भावनाको विकास हुने बताउनुभयो । विश्वमा एकदिनमा दुर्घटनाबाट ८ जना र १६ जनाले आत्महत्या गर्ने गरेको तथ्यांकले देखाएको बताउँदै उनले योग शिक्षाका माध्यमबाट यसलाई रोक्न सकिने जीकिर गर्नुभयो ।

कार्यक्रममा स्वामी आनन्द अरुणले विश्वमा राजनीतिक र धर्मका कारण झगडा हुने गरेको उल्लेख गर्दै योग र साधनाको माध्यमबाट विश्वलाई एकताबद्ध गर्न सकिने बताउनुभयो ।