काठमाडौं, २० पुस । पाकिस्तानले भारत प्रशासित कास्मिरबासीलाई खाना, स्वास्थ्य, अभिव्यक्ति स्वतन्त्रता लगायतका आधारभूत मौलिक अधिकारबाट वञ्चित गरेको आरोप लगाएको छ ।

पाकिस्तानी दूताबासबाट आज काठमाडौंमा आयोजित “जम्मू काश्मिरका जनताको लागि आत्मनिर्णयको अधिकार“ विषयक अन्तक्र्रियामा राजदूत डाक्टर मजहर जावेदले कास्मिरी जनतामाथि भारतले अन्याय गरेको आरोप लगाउनुभयो ।

राजदूत जावेदले काश्मिरी जनताको आत्मनिर्णयको अधिकारको सम्मान गर्दै त्यहाँ जनमत सङ्ग्रह गराउन संयुक्त राष्ट्र सङ्घको प्रतिबद्धता कार्यान्वयनका लागि अन्तरराष्ट्रिय समुदायलाई आह्वान गर्नुभयो । उहांले ७० वर्षअघि राष्ट्रसङ्घीय सुरक्षा परिषद्ले पारित गरेको काश्मिरसम्बन्धी प्रस्ताव कार्यान्वयनमा विश्व समुदायले सघाउनुपर्ने बताउनुभयो ।

उहाँले बितेका पाँच महिनामा उक्त क्षेत्रका जनता आधारभूत सेवाबाट वञ्चित भएकाले त्यसनिम्ति अन्तरराष्ट्रिय समुदायको सहयोग आवश्यक भएको बताउनुभयो ।

कश्मीरी आत्मनिर्णयको अधिकार बिषयक अन्तक्र्रियामा पाकिस्तानका राष्ट्रपति आरिफ अल्वी, प्रधानमन्त्री इमरान खान र विदेशमन्त्रीले कास्मिरी जनतालाई पठाएको सन्देशका बारेमा पनि छलफल भएको थियो । पाकिस्तानका राष्ट्रपति आरिफ अल्वीले पठाएको सन्देशमा भारतले ओगटेको जम्मू कश्मीरको वर्तमान अवस्था सबैभन्दा खराब भएको जिकिर गरेका छन् ।