काठमाडौ, २९ असोज । कम्युनिष्टहरुमा हुनुपर्ने गुण मध्ये अनुशासन, स्वच्छता र सुशासन महत्वपुर्ण कडिको रुपमा लिइन्छ । नेपालमा कम्युनिष्टले दुई तिहाइ बहुमतको साथमा राज्य सञ्चालन गरिहेको अवस्थाामा अनुशासनको खडेरी देखिएको छ । जनतालाई मिठा मिठा सपना देखाएर सत्तामा पुगे पछि सुशासनप्रति नेतृत्वमा अनुशासनको स्तर कम भएको देखिदै गएको छ । यो अवस्थामा चिनिया राष्ट्रपति सी चिनफिङले नेकपाका शिर्ष नेताहरुलाई दिएको पार्टी अनुशासनको पाठले महत्वपूर्ण सन्देश बोकेका छ ।

कम्युनिष्ट पार्टी सदस्यहरुका लागि पार्टी अनुशासन पार्टी जीवनको अजम्बरी कडिको रुपमा लिइन्छ । तर, पार्टीको अनुशासन, सुशासन र सांस्कृतिक शुद्धता भएन भने न त कोही कम्युनिष्ट बन्न सक्छ, न त कम्युनिष्ट नीति र सिद्धान्तलाई अघि बढाउन सक्छ ।

नेपालका कम्युनिष्टहरुमा रहेको सबैभन्दा ठूलो दीर्घ रोग अनुशासनको अभाव हो । पार्टी अनुशासन मान्न बाध्य नभएपछि ब्यक्ति सांस्कृतिक रुपमा विचलित हने, सुशासन समाप्त हुने, भ्रष्टाचारी बन्ने, जनतासंगको सम्बन्ध समाप्त हुने, र त्यसको प्रभाव सिंगो मुलुकमै पर्ने हुन्छ । नेपालका कम्युनिष्टबारे नजिकबाट बुझेका चिनिया कम्युनिष्ट पार्टीका महासचिव एवं राष्ट्रपति सी चिनफिङले आफ्नो नेपाल भ्रमणको क्रममा भेट गरेका नेकपाका नेताहरुलाई गतिलैसंग अनुशासनको पाठ पढाएका छन् ।

राष्ट्रपति सीले पार्टीमा अनुशासनको साथै स्वच्छता र सुशासन आवश्यक रहेको र त्यसमा निर्मम बन्नुपर्ने सुझाव दिए । सी ले दिएको सुझाव सुझाव मात्र थिएन, नेकपाका नेताहरुलाई गम्भीर ब्यंग पनि थियो । सी को सुझावपछि नेकपाले पार्टी अनुशासन पालना गर्न गराउनका लागि मुख्य नेतृत्व तहबाटै काम सुरु गर्न आवश्यक देखिन्छ ।

बुधबार नेपाल कम्युनिष्ट पार्टी नेकपाले दशैं, तिहार र छठ पर्वको अवसरमा आयोजित शुभकामना आदान प्रदान कार्यक्रम आयोजना गर्यो । चियापान कार्यक्रममा उपस्थित शिर्ष नेतादेखि कार्यकर्तासम्म कसरी कम्युनिष्ट पार्टीमा अनुशासन कायम गर्न सकिन्छ भन्ने विषयले चर्चा पायो ।
चीनमा चिनिया कम्युनिष्ट पार्टीको फलामे अनुशासनको कारण नै पार्टीले स्थापनाको ७०औं वर्ष मनाउंदा चीन बांकी संसाका लागि विकास र समृद्धिको आइकन बन्न पुग्यो । तर, नेपालका कम्युनिष्ट नेताहरु भने पार्टी अनुशासनलाई लत्याउंदै व्यक्तिवादी बन्न पुगे । जनतासंग जनताका लागि गर्नुपर्ने कम्युनिष्ट दैनिकी आफ्नो लागि आफ्नाका लागि बन्न पुग्यो ।

एकातिर जनसम्बन्ध कट्दै जाने अर्कातिर शिर्ष नेतृत्व तहमा रहेकाहरुमा सब मै हुं भन्ने प्रवृत्ति मौलाउंदै जांदा आफ्नो सांस्कृतिक धरातल कहां पुगेको छ भने हेक्का नहुने अवस्था सार्वजनिक भैसकेको छ । कम्युनिष्ट सदस्यहरु सर्वहारा वर्गको भन्दा सामन्तवादी र नोकरशाही पुंजिवादीको पक्षपोषण गर्ने प्रबृति हाबी हुदै गइरहेको देखिन्छ । नेतृत्वले सत्ता बाहिर हुदा समाजवाद र सत्ता पुगेपछि भद्दा पुंजीवादी शैली अपनाए पछि उनीहरुका तल्लोस्तरका नेता र कार्यकर्ताले पनि त्यही प्रवृत्ति अंगाल्ने नै भए । तर, यसले कम्युनिष्टलाई आफ्नो ठान्ने जनतामा भने नैराश्यता पैदा भएको छ । वर्तमान समयमा देखिएका केही प्रतिनिधिमुलक घटनालाई हेर्ने हो भने पनि कम्युनिष्ट नेता कार्यकर्तामा अनुशासनको स्तर स्खलित हुंदै गएको प्रष्टै हुन्छ ।

नेपाल भ्रमणको क्रममा चिनिया राष्ट्रपति सी ले जनताको मन जित्न र राज्य संचालन गर्न सबैभन्दा महत्वपूर्ण कुरा पार्टीभित्रको अनुशासन र सुशासन हुनुपर्ने भनि दिएको सुझावले नेकपा पार्टी पक्तिमा तरंग फैलाएको छ । मुलुकमा सुशासन कायम गर्न आर्थिक अनुशासन कायम, दण्डहीनताको अन्त्य, जनउत्तरदायी भूमिका, भ्रष्टाचारको रोकथाम र नियन्त्रण जस्ता बिषयलाई थोरै मात्रामा ध्यान दिने हो भने सुशासनलाई व्यवहारमा लागु गर्न सकिन्छ ।

सुशासन बिना कुनै पनि देशको आर्थिक, सामाजिक, राजनीतिक, सांस्कृतिक विकासको लक्ष्य हासिल गर्न सम्भव छैन । जनताप्रति उत्तरदायित्व, जवाफदेहिता, पारदर्शिता भएमात्र कम्युनिष्टमा अनुशासन हुन्छन् भन्ने सन्देश आज जनमानसमा जान्छ । सुशासन शव्द भाषणमा मात्र गर्ने तर व्यवहारमा त्यसको असर नदेखिदा आम जनतामा समेत निराशा बढिरहेको छ ।
त्यसैले दुइ तिहाई बुहमतका साथ सरकारको नेतृत्व गरेको नेपाल कम्युनिष्ट पार्टीका नेता तथा कार्यकर्ताले कम्युनिष्ट राष्ट्र चीन र त्यसका राष्ट्रपति सी ले दिएको सटिक सन्देशबाट पाठ सिकेर सुशासनको यात्रालाई अगाडि बढाउनु आवश्यक छ ।