विराटनगर, १२ माघ  ।  प्रदेश नं १ का मुख्यमन्त्री शेरधन राईले तराईमा लामखुट्टेबाट सर्ने रोगबाट हुने अकाल मृत्यु रोकथामका लागि प्रदेश सरकार संवेदनशील रहेको बताउनु भएको छ । 

मोरङ क्षेत्र नं ४ का सङ्घीय सांसद अमनलाल मोदीले दक्षिण कोरियाको क्रुपी फाउण्डेसनबाट उपलब्ध गराइएका ३० थान लामखुट्टे (मच्छर) नियन्त्रण गर्ने उपकरण मेशिन आज स्थानीय जनप्रतिनिधिलाई हस्तान्तरण गर्दै उहाँले सो कुरा बताउनुभएको हो । मुख्यमन्त्री राईले जनप्रतिनिधिले मानव स्वास्थ्य रक्षामा सदैव कार्य गर्नुपर्नेमा जोड दिनुभयो ।

उहाँले सङ्घीय संरचनाअनुसार तीन तहको सरकार विकास र समृद्धका लागि काँधमा काँध मिलाई हिँडिरहेको दाबी गर्दै जनताको विकासको चाहना चाँडै नै पूरा हुने विश्वास व्यक्त गर्नुभयो । 

मुख्यमन्त्री राईले तराई, पहाड र हिमाल विविधिताले भरिएको यस देशमा शान्ति सुशासन कायम भई विकास मात्र एक एजेण्डा रहेकाले विश्वका मित्रदेशीहरु आर्थिक समृद्ध कायममा सहयोग गर्न आतुर रहेको बताउनुभयो । 

सामाजिक विकासमन्त्री जीवन घिमिरेले यस क्षेत्रमा अकल्पनीय रुपमा विकास निर्माणका कार्य भइरहेको बताउँदै जनताले त्यसको अनुभूति र परिणाम केही सयमदेखि देखिने धारणा व्यक्त गर्नुभयो । उहाँले यस क्षेत्रका बसोबास गर्ने आदिवासी, जनजाति पिछडिएका दलित एवम् गरीब जनताले प्राप्त सहयोगवाट जीवन सहज हुने बताउनुभयो । 

सङ्घीय सांसद अमनलाल मोदीले लामखुट्टेका कारण विभिन्न रोगबाट सर्वसाधारण जीवन जोगाउन मेशिन उपयोगी हुने विश्वासले सहयोग गरेको बताउँदै आगामी दिन जनताको आर्थिक आयआर्जनमा कार्य जोड दिने धारणा राख्नुभयो ।

विराटनगर महानगरपालिका प्रमुख भीम पराजुलीले लामखुट्टे नियन्त्रण विषादी प्रयोगमा सावधानी अपनाउन आग्रह गर्दै महानगरले यस क्षेत्रमा तीन÷चार महीनामा नियन्त्रण अभियान सञ्चालन गर्न गरेको जानकारी दिनुभयो । 

सहयोगी संस्था क्रुपका दक्षिण कोरियाका टोली नेतृत्वद्वय ली हान हू र चे होङ्गले नेपालीमा मन्तव्य राख्दै नेपाली जनतालाई सानो सहयोग गर्न पाउँदा खुशी व्यक्त गर्दै आगामी दिनमा थप सहयोग गर्ने वचनबद्धता व्यक्त गर्नुभयो ।