पाल्पा, २५ कात्तिक । कृत्रिम तालका रूपमा विकास गरिएको रामपुरको तालपोखरामा डुङ्गा सयर गर्नेको आकर्षण बढ्दै गएको छ । सामाजिक सञ्जाल, सञ्चारमाध्यममा तालपोखराको फोटोसहित समाचार आउन थालेपछि पर्यटकको सङ्ख्यामा वृद्धि आएको हो ।

तालपोखरामा डुङ्गा सयर गर्दा फेवातालको झल्को मेटाएको पाल्पा बगनासकाली गाउँपालिका आर्यभन्ज्याङ्की नारायणी भट्टराईले बताउनुभयो । तालपोखराको भौतिक पूर्वाधार अगाडि बढ्दै गएको खण्डमा फेवातालले जस्तै राष्ट्रिय तथा अन्तर्राष्ट्रियस्तरमा पहिचान बनाउनसक्ने उहाँ बताउनुुहुन्छ ।

करीब ५५ रोपनी क्षेत्रफलमा फैलिएको कृत्रिमताल अवलोकन गर्न आउने आन्तरिक पर्यटकको अहिले चाप बढ्दै गएको हो । दिनहुँ दुई सय भन्दा बढी पर्यटकले डुङ्गा सयर गर्ने गरेको तालपोखरा संरक्षण समितिका सचिव सुनिल देवकोटा बताउनुुहुन्छ ।

फेवातालको स्वरूपमा निर्मित तालपोखरामा डुङ्गा सयर गर्ने, तालको बीचमा रहेको जलेश्वर महादेवको मूर्तिमा पूजा गर्ने, फोटो खिचाउनेको चहलपहल रहेको छ । “डुङ्गा सयर गरेर ताल वरिपरि घुम्दै आनन्द लिन आउनेको सङ्ख्या दिनानुदिन बढ्दै जाँदा आम्दानी पनि राम्रै हुँदै गएको छ” देवकोटाले भन्नुभयो ।

साउनबाट यता पाँच हजार पर्यटकले डुङ्गा सयर गरेको र दुई लाख ५० हजार रुपैयाँ बराबरको आम्दानी भएको छ । २०७४ माघ २४ गतेदेखि तालपोखरामा डुङ्गा सञ्चालन शुरु गरिएको हो । यहाँ नियमितरूपमा दुईवटा डुङ्गा सञ्चालनमा छन् ।

अहिलेसम्म डुङ्गा सञ्चालनबाट रु आठ लाख बराबरको आम्दानी भएको समितिका सचिव देवकोटाले जानकारी दिनुभयो । डुङ्गाबाट उठेको आम्दानीको ४० प्रतिशत रकम डुङ्गा चलाउनेलाई दिने व्यवस्था गरिएको छ । प्रतिव्यक्ति रु ५० टिकट कायम गरिएको छ ।

आम्दानीको स्रोत बढाउन तालपोखरामा माछाका भुरासमेत राखिएको छ । अहिले १६ हजार माछा यहाँ रहेका छन् । माछा बिक्रीबाट करीब रु २० लाख बराबरको आम्दानी गर्ने समितिको सोच छ ।

कृत्रिम तालसँगै २० रोपनी क्षेत्रफलमा पार्क निर्माण गरिएको छ । पार्कबाट पनि राम्रै आम्दानी गर्ने वातावरण मिलेको छ । अहिलेसम्म पार्कबाट रु २५ हजार बराबरको आम्दानी भएको छ । पार्क प्रवेश शुल्क प्रतिव्यक्ति रु पाँच कायम गरिएको छ ।

मासिक रु ५० हजार खर्च हुने गरेको छ । दानपेटिकाबाट रु एक लाख भन्दा बढी रकम सङ्कलन भएको छ । तालपोखराको भौतिक पूर्वाधारमा हालसम्म रु एक करोड २० लाख रकम खर्च भइसकेको छ भने बाँकी रु एक करोड बराबरको रकम लाग्ने अनुमान छ । अहिलेसम्म पाल्पा, स्याङ्जा, तनहुँ, नवलरासी, रुपन्देही, कास्की, चितवन, नेपालगञ्ज, इलाम, अछामलगायत थुप्रै जिल्लाका आन्तरिक पर्यटक भित्रिसकेको तालपोखरा संरक्षण समितिका अध्यक्ष भरतराज देवकोटाले बताउनुभयो ।

“निकट भविष्यमा पाल्पा सदरमुकाम तानसेन र पोखरा आएका बाह्य पर्यटकलाई रामपुरमा भित्र्याउने योजनाका साथ काम गरिरहेका छौँ” उहाँले भन्नुभयो, “तालपोखराको विकासका लागि स्थानीयवासीले महायज्ञ सञ्चालनबाट रकम सङ्कलन गरी २०६६ बाट यसको काम अगाडि बढाएका हुन् ।

रामपुर नगरपालिकाले आ व २०७३-.७४ मा एक लाख २५ हजार, ०७४-७५ मा २८ लाख र ०७५-७६ मा रु २० लाख रकम भौतिक पूर्वाधारका निम्ति सहयोग गरेको समितिका लेखापाल पुरुषोत्तम ढकालले जानकारी दिनुभयो । सरकारले हालैमात्र एक सय पर्यटकीय क्षेत्र अन्तर्गत तालपोखरालाई पनि पर्यटकीय क्षेत्रका रूपमा सूचीकृत गरेको छ ।