काठमाडौं, २९ चैत । गृहमन्त्री सुधन गुरुङको शेयर बजारमा ४ करोड ३१ लाख ५६ हजार २ सय रुपैयाँ बराबरको लगानी रहेको विवरण सार्वजनिक भएको छ।

प्रधानमन्त्री तथा मन्त्रिपरिषद् कार्यालयले आइतबार साँझ प्रधानमन्त्रीसहित मन्त्रीहरूको सम्पत्ति विवरण सार्वजनिक गरेको हो। सार्वजनिक विवरणअनुसार गृहमन्त्री गुरुङको कुल ४ करोड ३१ लाख ५६ हजार २ सय रुपैयाँ बराबरको शेयर लगानी देखिएको छ।

सम्पत्ति विवरणमा होप होल्डिङ्स प्रालिमा उहाँको ३० हजार थान साधारण शेयर रहेको उल्लेख गरिएको छ। उक्त शेयरको मूल्य ३० लाख रुपैयाँ तोकिएको छ।

त्यस्तै, लगुम प्रिमियम अपार्टमेन्ट्स प्रालिमा ५ हजार ७ सय थान साधारण शेयर रहेको जनाइएको छ। यस कम्पनीमा रहेको शेयरको मूल्य ५७ लाख रुपैयाँ रहेको विवरणमा उल्लेख छ।

गृहमन्त्री गुरुङले सबैभन्दा ठूलो लगानी धितोपत्र बजारमा कारोबार हुने शेयरहरूमा रहेको जनाउनुभएको छ। व्यवसायिक तथा पैतृक सम्पत्तिको स्रोत देखाउँदै उहाँले २ करोड ७४ लाख ५६ हजार २ सय रुपैयाँ बराबरको लगानी धितोपत्र बजारमा रहेको उल्लेख गर्नुभएको छ।

यसैगरी, एड्भेन्चर भिल्ला प्रालिमा पनि उहाँको शेयर लगानी रहेको विवरणमा जनाइएको छ। उक्त कम्पनीमा ७० हजार थान शेयर रहेको र त्यसको मूल्य ७० लाख रुपैयाँ रहेको उल्लेख छ।

प्रधानमन्त्री कार्यालयले सार्वजनिक गरेको विवरणसँगै मन्त्रीहरूको सम्पत्ति र लगानीबारे राजनीतिक तथा सार्वजनिक वृत्तमा चासो बढेको छ।