काठमाडौं १० असार । इजरायलले अमेरिकी राष्ट्रपति डोनाल्ड ट्रम्पको इरानसँग युद्धविराम प्रस्तावलाई स्वीकार गरेको छ । इजरायलका प्रधानमन्त्री बेन्जमिन नेतान्याहूले एक वक्तव्यमा मार्फत ट्रम्पका प्रस्ताव स्वीकार गरेको घोषण गरेका हुन् । ट्रम्पले युद्धविराम तत्काल लागू भएको र दुवै पक्षलाई यसको उल्लंघन नगर्न आग्रह गरेको यस अघि नै बताइसकेका थिए ।
यो घोषणा इरानले इजरायलमा धेरै मिसाइलहरू प्रहार गरे लगत्तै भएको हो । युद्ध विराम लागू हुनु केही मिनेट पहिले भएको इरानी मिसाइल आक्रमणमा इजरायलको दक्षिणी सहर बेरशेबामा कम्तीमा चार जनाको ज्यान लिएको थियो।
यसअघि, इरानका विदेशमन्त्री अब्बास अराघचीले इजरायलसँग युद्धविराममा कुनै सम्झौता नभएको तर इजरायलले आफ्नो ूगैरकानुनी आक्रमणू स्थानीय समयअनुसार बिहान ४ बजे सम्म रोकेमा तेहरानले आक्रमणहरू बन्द गर्ने बताएका थिए।
इरानले सोमबार साँझ कतारमा रहेको अमेरिकी सैनिकहरूको सैन्य अखडामा मिसाइलहरू प्रहार गरेको थियो । इरानको त्यो जबाफी कारबाही अमेरिकाले एक दिनअघि इरानका आणविक स्थलहरूमा गरेको आक्रमणको बदलामा गरेको थियो।
इरानका अनुसार, इजरायलले जुन १३ मा आक्रमण सुरु गरेदेखि ४०० भन्दा बढी व्यक्तिहरू, जसमा १३ बालबालिका समेत मारिएका भने कम्तीमा ३,०५६ जना घाइते भएका छन्। इजरायलमा भने इरानी आक्रमणबाट कम्तीमा २४ जनाको मृत्यु भएको छ।