काठमाडौं १ असार । शनिबार अमेरिकामा देशभरका सहरहरूमा राष्ट्रपति डोनाल्ड ट्रम्पविरुद्ध हजारौं प्रदर्शनकारीहरूले सडक, पार्क र चोकहरूमा जम्मा भएर अमेरिकी लोकतन्त्रको रक्षा गर्न र उनको प्रशासनको अत्यधिक शक्ति प्रयोगको विरोधमा ठूलो प्रदर्शन गरे। नो किंग्स नारासहित आयोजित यी प्रदर्शनहरू साना सहरदेखि न्यूयोर्क, फिलाडेल्फिया, शिकागो, ह्युस्टन र लस एन्जलसजस्ता ठूला सहरहरूमा फैलिएका थिए।

ट्रम्पको सैन्य परेड र आप्रवासन नीतिविरुद्ध प्रदर्शन
ट्रम्प प्रशासनको आप्रवासन नीति, सङ्घीय खर्च कटौती र वासिङ्टनमा आयोजित सैन्य परेड सँगै ट्रम्पको ७९औँ जन्मदिन उत्सव यी प्रदर्शनहरूको मुख्य कारण थिए। देशभर करिब २,००० स्थानमा प्रदर्शन आयोजना गरिएको अमेरिकी मिडियाले प्रमुखताकासाथ उल्लेख गरेका छन् ।
वासिङ्टनमा सैन्य परेड हुँदा नो किंग्स आयोजकहरूले त्यहाँ भने प्रदर्शन नगर्ने निर्णय गरेका थिए । ट्रम्पले परेडमा विरोध गर्नेहरूलाई ूठूलो बलू प्रयोग गर्ने चेतावनी यस अघि नै दिएका थिए।

लस एन्जलसमा तनाव र कर्फ्यू
लस एन्जलसमा साँझ ८ बजेपछि कर्फ्यू लागू भएसँगै प्रहरी र प्रदर्शनकारीहरूबीच तनाव बढेको छ । प्रहरीले सङ्घीय भवनहरूबाट प्रदर्शनकारीहरूलाई हटाउन अश्रु ग्याँस र लाठी चार्ज गरेको थियो । लस एन्जलस प्रहरी विभाग (एलएपीडी) ले सामाजिक सञ्जाल एक्समा प्रदर्शनकारीहरूले ढुङ्गा, बोतल र आतिशबाजी प्रहरीतर्फ फ्याँकेको आरोप लगाएको छ।
ट्रम्पले क्यालिफोर्नियाका गभर्नरको आपत्तिका बावजुद २,००० राष्ट्रिय गार्ड र ७०० अमेरिकी मरीन लस एन्जलसमा खटाएका थिए। क्यालिफोर्नियाका गभर्नर ग्याभिन न्यूसोम र लस एन्जलसका मेयर करेन बासले ट्रम्पले आप्रवासन छापा मार्फत जानाजान क्यालिफोर्नियामा सङ्कट निम्त्याउन खोजेको आरोप लगाएका छन्। बिहीबार एक सङ्घीय न्यायाधीशले ट्रम्पको सैन्य परिचालन गैरकानुनी भएको फैसला गरे पनि, नवौँ सर्किट अपील अदालतले मङ्गलबारसम्म उक्त फैसला स्थगित गरेको छ।

देशभरका प्रदर्शनहरू

ह्युस्टनः प्रदर्शनकारीहरूले प्रहरीलाई फूल वितरण गर्दै प्रदर्शनलाई शान्तिपूर्ण बनाएका थिए।
शिकागोः प्रहरी र प्रदर्शनकारीहरूबीच दुई घण्टाको गतिरोध भए पनि शान्तिपूर्वक समाप्त भएको थियो ।
अस्टिन, टेक्सासः प्रहरीले प्रदर्शनकारीहरूलाई सडक खाली गर्न बारम्बार चेतावनी दिंदै केही प्रदर्शनकारीहरूलाई मरिचको धूलो प्रयोग प्रहार गरेको थियो ।
पोर्टल्यान्ड, ओरेगनः आप्रवासन र भन्सार कार्यान्वयन (आईसीई) कार्यालय नजिकैको क्षेत्रलाई प्रहरीले दङ्गा क्षेत्र घोषणा गर्‍यो, र प्रदर्शनकारीहरूलाई तितरबितर पार्न अश्रु ग्याँस प्रहार गरेको थियो ।
मिनेसोटाः डेमोक्रेटिक सांसद मेलिसा हर्टम्यानको हत्या भएका कारण राज्यका अन्य प्रदर्शनहरू रद्द गरिएका थिए भने सेंट पलमा ठूलो भीड जम्मा भएको सीएनएनले जनाएको छ ।

प्रदर्शनकारीहरूको माग
प्रदर्शनकारीहरूले ट्रम्प प्रशासनले अदालतको अवहेलना गरेको, अमेरिकी नागरिकहरूलाई निर्वासित गरेको, सडकबाट मानिसहरूलाई बेपत्ता पारेको र नागरिक अधिकारहरूमा आक्रमण गरेको आरोप लगाएका छन् । धेरैले मेडिकेड कटौती, ट्रान्सजेन्डर अधिकार सीमित गर्ने नीति र सङ्घीय बजेट कटौतीको विरोध गर्दै आएका छन् ।

सङ्गठन र सहभागिता
नो किंग्स प्रदर्शनहरू २०० भन्दा बढी सङ्गठनहरू, जस्तै ५०५०१, इन्डिभिजिबल र अमेरिकी नागरिक स्वतन्त्रता सङ्घ (एसीएलयू) ले समन्वय गरेका थिए। यी समूहहरूले ट्रम्पको दोस्रो कार्यकाल सुरु भएदेखि सामाजिक सुरक्षा, स्वास्थ्य सेवा र शिक्षामा कटौतीविरुद्ध प्रदर्शन गर्दै आएका छन्।

अन्य घटनाहरू

टेक्सासः सांसदहरूलाई लक्षित ‘विश्वसनीय खतरा’ पछि अस्टिनमा टेक्सास स्टेट क्यापिटल अस्थायी रूपमा बन्द गर्नुका साथै एक व्यक्तिलाई हिरासतमा लिइएको छ ।
स्प्रिङफिल्ड, ओहायोः हाइटी आप्रवासीहरूलाई निशाना बनाइएको ठाउँमा ट्रम्प समर्थक एक व्यक्तिलाई प्रदर्शनकारीहरूसँगको झडपपछि पक्राउ गरियो।
फिलाडेल्फियाः सानो प्रदर्शन शान्तिपूर्वक समाप्त भयो, तर केही प्रदर्शनकारीहरूलाई हिरासतमा लिइएको बताइएको छ ।

अमेरिकामा ट्रम्पविरुद्ध व्यापक विरोध प्रदर्शन, लस एन्जलसमा पुनः कर्फ्यू

लस एन्जलसमा कर्फ्यू लागू भएपछि सडकहरू सुनसान भएका छन् । तर प्रदर्शनकारीहरूको सङ्ख्या र तिनीहरूको आक्रोशले देशभर ट्रम्प प्रशासनविरुद्धको असन्तुष्टि सडकमा पोखिएको छ । प्रदर्शनकारीहरूले शान्तिपूर्ण तरिकाले आफ्नो आवाज उठाए पनि, केही ठाउँमा प्रहरीसँगको झडपले तनाव सिर्जना गरेको छ। यी घटनाहरूले अमेरिकाको राजनीतिक माहौलमा गहिरो विभाजन रहेको सङ्केत गर्छ।

यो समाचार विभिन्न समाचार स्रोतहरूबाट सङ्कलित जानकारीमा आधारित छ।