काठमाडौं १ असार । इजरायलले इरानको राजधानी तेहरानमा आइतबार बिहान नयाँ आक्रमणको क्रममा शहरको मुख्य ग्यास डिपोमा आक्रमण गर्दा तेहरानको आकाश धुवाँ र ज्वालाले ढाकिएको छ। यो आक्रमणले दुई देशबीचको तनावलाई थप उग्र बनाएको को अमेरिकी मिडियाले रिपोर्ट गरेका छन् ।

इजरायल र इरानले शनिबार रातिदेखि एकअर्कामाथि आक्रमणको नयाँ लहर शुरू गरेका छन्। दुवै देशका नेताहरूले अन्तर्राष्ट्रिय समुदायको डि–एस्केलेसनको आह्वानलाई बेवास्ता गर्दै आक्रमणलाई तीव्र बनाउने प्रतिबद्धता व्यक्त गरेका छन्।
इरानको तेल मन्त्रालयले शाह्रान इन्धन डिपोमा आक्रमण भएको र आगलागी भएको बताएको छ। मन्त्रालयका एक अधिकारीले उक्त डिपोमा ११ वटा भण्डारण ट्यांकहरू रहेको र ती एकपछि अर्को विस्फोट भइरहेको बताए। यसले आसपासका आवासीय क्षेत्रमा ठूलो क्षति पुर्‍याउने खतरा रहेको छ। डिपोको ठीक अगाडि रहेको एक उच्च भवनमा बस्ने एक बासिन्दाले विस्फोटको शक्ति भूकम्पजस्तै महसुस भएको र धेरै प्रत्यक्षदर्शीहरूले आगो फैलिँदै तेहरान वरपरका पहाडहरू उज्यालो भएको बताएको न्यूयोर्क टाइम्सले उल्लेख गरेको छ ।
इजरायली हवाई रक्षा प्रणालीले शनिबार राति इरानी ब्यालिस्टिक मिसाइलहरूलाई रोकेको दावी गरेको छ । प्रतिरोध फायरिंगका कारण यरुशलेमको आकाशमा विस्फोटहरूको दृश्य उत्पन्न गरेको थियो। इजरायली टेलिभिजनमा देखाइएका तस्वीरहरूले इरानबाट प्रहार गरिएका पछिल्ला मिसाइलहरू पहिलो पटक उत्तरी शहर हाइफालाई पनि निशाना बनाइएको देखिएको छ ।
इजरायली सेनाले सामाजिक सञ्जालमार्फत आफ्नो वायुसेनाले इरानमा सैन्य लक्ष्यहरूमाथि आक्रमण गरिरहेको घोषणा गरेको छ। इरानी सरकारी सञ्चारमाध्यमले पनि तेहरानले इजरायलमाथि मिसाइल आक्रमणको नयाँ चरण शुरू गरेको पुष्टि गरेको छ।
दुई देशबीच इजरायलले आक्रमण शुरु गरेपछि युद्ध तेस्रो दिनमा प्रवेश गरेको छ। यसले पुरानो द्वन्द्वमा दशकौंदेखिको सबैभन्दा चर्को लडाइँ सतहमा आएको छ ।
इजरायलको आक्रमण र इरानको जवाफ
शुक्रबार बिहानदेखि शुरू भएको व्यापक आक्रमणमा इजरायलले इरानको परमाणु स्थलहरू, हवाई रक्षा प्रणाली र सैन्य लक्ष्यहरूलाई केन्द्रित गरेको थियो। तर शनिबार, इजरायलले इरानको अर्थतन्त्रका लागि महत्वपूर्ण ऊर्जा उद्योगलाई निशाना बनाउँदै तेहरानको शाह्रान इन्धन डिपो र दक्षिण तेहरानको शहर रे तेल रिफाइनरीमा आक्रमण भएको इरानी तेल मन्त्रालयले जनाएको छ। इजरायली सेनाले तेहरानको हवाई रक्षा प्रणालीलाई नष्ट गरी ‘हवाई स्वतन्त्रता’ हासिल गरेको दाबी गरेको छ । यस्तो अवस्थाले उनीहरूलाई बिना अवरोध लक्ष्यहरूमा आक्रमण गर्न सक्षम बनाएको छ।
इजरायली प्रवक्ता ब्रिगेडियर जनरल एफी डेफ्रिनले इजरायली सेनाले तेहरानको आकाशमा ‘स्वतन्त्रता प्राप्त गरेको’ बताए, जसले इरानको रक्षा प्रणालीलाई कमजोर बनाएको संकेत गर्छ।

इरानले जवाफमा इजरायलमाथि सयौं ब्यालिस्टिक मिसाइल र ड्रोनहरू प्रहार गर्दै तेहरानले इजरायली सैन्य अखडाहरुलाई लक्षित गरेको दाबी गरेको छ। इजरायली स्रोतहरूका अनुसार, इरानको आक्रमणमा कम्तीमा तीन जनाको मृत्यु भएको छ र दर्जनौं घाइते भएका छन्। इजरायलले दुई दिनमा इरानमाथि करिब १५० आक्रमण गरेको छ भने इरानी सेनाले इजरायलतर्फ २०० ब्यालिस्टिक मिसाइल र धेरै ड्रोनहरू प्रहार गरेको छ।

क्षेत्रीय र विश्व प्रभाव
इजरायलको आक्रमणले इरानको तेल र ग्यास उद्योगलाई निशाना बनाएपछि विश्व बजारमा तेलको मूल्यमा ठूलो उछाल आएको छ। इरानको दक्षिणी बुशहर प्रान्तमा रहेको विश्वको सबैभन्दा ठूलो प्राकृतिक ग्यास क्षेत्र साउथ पार्समा पनि आगलागी भएको इरानी सरकारी सन्चार माध्यमले जनाएको छ। यो आक्रमणले इरानको ऊर्जा निर्यातमा गम्भीर प्रभाव पार्न सक्छ, जसले विश्वव्यापी ऊर्जा आपूर्तिलाई प्रभावित गर्नेछ।
इरानको तेल मन्त्रालयले तेल सुविधाहरूमा कुनै ठूलो क्षति नभएको दाबी गरे पनि, तेहरानका बासिन्दाहरूले इन्धन अभावको डरले पेट्रोल स्टेशनहरूमा लामो लाइन लागेका छन्। इरानको सूचना तथा सञ्चार मन्त्रालयले ‘विशेष परिस्थितिका कारण’ अस्थायी रूपमा इन्टरनेटमा प्रतिबन्ध लगाएको छ।

हुथी नेतृत्वमाथि आक्रमण
इरानको सबैभन्दा बलियो प्रोक्सी फोर्सलाई कमजोर पार्ने प्रयासमा, इजरायलले शनिबार राति यमनमा हुथी नेतृत्वको बैठकलाई निशाना बनाएको छ। इजरायली अधिकारीहरूका अनुसार, हुथीको सैन्य प्रमुख मोहम्मद अल घमारी सहितका नेताहरूलाई लक्षित गरिएको बताएपनि उनीहरूको मृत्यु भएको पुष्टि भएको छैन।

परमाणु वार्ता भंग
इजरायलको आक्रमणले संयुक्त राज्य अमेरिका र इरानबीचको परमाणु कार्यक्रमबारेको वार्तालाई भंग गरेको छ। यो वार्ता आइतबार ओमानमा पुनः शुरू हुने तय थियो ।