काठमाडौं ३० जेठ। इरानको सरकारी मिडियाका अनुसार इजरायली आक्रमणमा इरानको इस्लामिक रिभोलुसनरी गार्ड कोरका कमान्डर–इन–चीफ मारिएका छन्। इरानको सर्वोच्च नेता आयातोल्लाह अली खामेनीका सल्लाहकार अली शमखानी इजरायलको पछिल्लो केही घण्टाको तेहरान आक्रमणमा ‘गम्भीर रूपमा घाइते’ भएको इरानको सरकारी समाचार संस्था नूर न्यूजले जनाएको छ।

एक भिडियो स्क्रीनग्र्याबमा तेहरानबाट करिब २६० किलोमिटर दक्षिणमा रहेको नटान्ज आणविक सुविधातर्फ धुवाँ उठिरहेको देखिएको छ।

इजरायली युद्धविमानहरूले शुक्रबार राति इरानमाथि आक्रमण गरेपछि त्यस क्षेत्रमा पूर्ण युद्धको डर बढाएको छ।

यो घटनाले ट्रम्पको दोस्रो कार्यकालको सुरुवातमै ठूलो चुनौती खडा गरेको छ। उनले इजरायली प्रधानमन्त्री बेन्जामिन नेतन्याहुसँग यसै साता आक्रमण नगर्न आग्रह गरेका थिए, तर इजरायलले त्यसलाई बेवास्ता गर्‍यो। स्रोतका अनुसार ट्रम्प र उनका सहयोगीहरूलाई यो आक्रमण हुने सम्भावनाबारे पहिल्यै जानकारी थियो।

अमेरिकी विदेशमन्त्री मार्को रुबियोले एक संक्षिप्त वक्तव्यमार्फत अमेरिका यो आक्रमणमा संलग्न नरहेको र क्षेत्रमा रहेका अमेरिकी सेनाको सुरक्षालाई प्राथमिकता दिइरहेको स्पष्ट पारे। उनले इरानलाई अमेरिकी हित वा कर्मचारीहरूलाई निशाना नबनाउन चेतावनी दिए। वक्तव्यमा इजरायलको रक्षाप्रति समर्थनको सामान्य भाषा पनि समावेश थिएन, जसले यो इजरायलको आफ्नै द्वन्द्व भएको संकेत गर्छ।

यो आक्रमणले ट्रम्प र नेतन्याहुबीचको पहिल्यै तनावपूर्ण सम्बन्धलाई थप जटिल बनाएको छ र मध्यपूर्वमा रहेका हजारौं अमेरिकी सैनिकहरू सम्भावित क्षेत्रीय द्वन्द्वको चपेटमा पर्न सक्ने जोखिम बढाएको छ।
इरानको सशस्त्र बलका प्रवक्ताले इजरायल र अमेरिकालाई ‘कडा झापड’ दिने चेतावनी

इरानको सशस्त्र बलका प्रवक्ता जनरल शेकार्चीले सरकारी टेलिभिजनमा बोल्दै इजरायल र संयुक्त राज्य अमेरिकाले ‘कडा झापड’ खाने चेतावनी दिएका छन्। उनले इरानको सशस्त्र बल तयार रहेको र चाँडै नै जवाफी आक्रमण गर्ने बताए। उनले भने, “जवाफी आक्रमण निश्चित छ, ईश्वरको इच्छाले।”