काठमाडौ २५ जेठ । प्रधानमन्त्री एवं नेकपा एमाले अध्यक्ष केपी शर्मा ओलीले पूर्वराष्ट्रपति विद्यादेवी भण्डारी राजनीतिमा फर्किने विषयलाई लिएर टिप्पणी गरेका छन्।

आइतबार काठमाडौँमा अनेरास्ववियुको २४ औं राष्ट्रिय महाधिवेशनलाई सम्बोधन गर्दै उनले भण्डारीको नाम नलिइ पार्टीभित्र अर्को खेल हुन थालेको बताए।

‘अहिले हल्ला चलेको छ, तल–तल यो ग्रुप भनेका छन्, त्यो ग्रुप भनेका छन्,’ ओलीले भने, ‘यो ग्रुप र त्यो ग्रुपको कुनै आवश्यकता छैन। यस्ता कुरालाई तपाईंहरुले सुन्ने बित्तिकै यस्ता कुरा नगर्नुस् भन्ने जवाफ दिइहाल्नुस्। फलानाका ग्रुप, यसका ग्रुप त्यो छोडिदिनुस्। अर्को खेल हुन खोजेको छ, यहाँ अब फलाना आउने अरे, फलाना आउने अरे, यस्तो यस्तो।’

कसलाई नेतृत्व दिनेबारे पार्टीमा कुनै छलफल नभएको भन्दै उनले बाहिर हल्ला चलाएर पार्टी कमजारे बनाउन खोजिएको दाबी गरे।

‘पार्टीमा कुनै छलफल नै भएको छैन, को महासचिव, को अध्यक्ष, को उपाध्यक्ष, अहिले महाधिवेशन घोषणै भएको छैन,’ ओलीले भने, ‘महाधिवेशनमा के गर्ने सरसल्लाह भएको छैन। छलफल भएको छैन। अनि यो बाहिर बाहिरका हल्ला चलाएर पार्टीलाई कमजोर पार्न खोज्ने, पार्टी कार्यकर्ताको मनस्थिति बिथोल्न खोज्ने यस्ता दुष्प्रयासहरुलाई सोझै इन्कार गर्नुस्। यस्ता खालका कुरा नगर्न त्यस्ताहरुलाई जवाफ दिनुस्। स्टाटस, सिस्टाटसलाई पनि जवाफ दिए हुन्छ।’

प्रधानमनत्री ओलीले पार्टीका आन्तरिक कुरा भए पार्टीभित्र गर्न र सामाजिक सञ्जालबाट पार्टीलाई खुइल्याउने, होच्याउने, अपमान गर्ने काम नगर्न चेतावनी दिए।