काठमाडौँ, ४ जेठ । पन्जाब किंग्स इन्डियन प्रिमियर लिगमा दिल्ली क्यापिटल्ससँग १५ रनले पराजित भएको छ । २१४ रनको लक्ष्य पछ्याएको पन्जाबका लागि लियाम लिभिङस्टोनको प्रयास असफल भयो ।

यो हारसँगै पन्जाबको प्लेअफ सम्भावना अंक गणितीय मात्रै बाँकी रहेको छ ।

जितका लागि २१४ रनको विशाल लक्ष्य पछ्याएको पन्जाबले निर्धारित २० ओभरमा ८ विकेट गुमाउँदै १९८ रन बनाउन सक्यो । पन्जाबका लिभिङस्टोनले ४८ बलमा ९ छक्का र ५ चौकासहित सर्वाधिक ९४ रन बनाए पनि जित दिलाउन सकेनन् ।

त्यस्तै, अथर्व टाडेले ४२ बलमा २ छक्का र ५ चौकासहित ५५ रनमा रिटायर्डहर्ट आउट भएका थिए । अन्य कुनै पन्जाबी ब्याटरले राम्रो प्रदर्शन गर्न सकेनन् ।

दिल्लीका इशान शर्मा र एनरिच नोर्कियाले समान २–२ विकेट लिए । खलिल अहमद र अक्षर पटेलले समान एक विकेट लिए ।

यसअघि, हिमाञ्चल प्रदेशको धर्मशालामा टस हारेर पहिला ब्याटिङको निम्तो पाएको दिल्लीले २० ओभरमा मात्र २ विकेटको नोक्सानीमा २१३ रनको योगफल बनायो । यसअघि नै प्रतियोगिताबाट बाहिरिसकेको दिल्लीको इनिङ्समा कप्तान डेविड वार्नरले ४७ रन जोडे । पृथ्वी शाँले ५४ रन बनाए । राइली रोसोउलाई रोक्न नसक्दा पन्जाबले विशाल लक्ष्य पाएको हो । उनले ३७ बलमा ६ छक्का र ६ चौकाको मद्धतमा नटआउट ८२ रन बनाए । फिल साल्टले २६ रन जोडे ।

पन्जाबका साम करनले २ विकेट लिए ।

यो हारपछि पन्जाब प्रतियोगिताबाट बाहिरिने संघारमा पुगेको छ । आठौँ स्थानमा रहेको उसको १३ खेलबाट १२ अंक छ । अब पन्जाबले अन्य टिमको नतिजाब भर पर्नु पर्ने छ ।

पन्जाबले अन्तिम खेल शुक्रबार राजस्थान रोयल्ससँग खेल्ने छ । दिल्लीले अन्तिम खेल शनिबार चेन्नइ सुपर किंग्ससँग खेल्ने छ । पन्जाब प्लेअफ अन्तिम खेलमा फराकिलो जितका साथै बेंगलोर, कोलकाता र मुम्बइले बाँकी खेल हार्नुपर्ने हुन्छ ।