काठमाडौँ २८ मंसिर । निर्वाचन आयोगले मंसिर ४ गते भएको प्रतिनिधिसभा र प्रदेशसभा निर्वाचनको अन्तिम परिणाम सार्वजनिक गरेको छ । प्रत्यक्ष र समानुपातिक निर्वाचनतर्फको परिणाम निर्वाचन सम्पन्न भएको तीन सातापछि आयोगले सार्वजनिक गरेको हो ।

प्रतिनिधिसभा तर्फ १६५ प्रत्यक्ष र समानुपातिकतर्फ ११० सिट तथा प्रदेशसभा तर्फ ३३० र २२० सिटको परिणाम सार्वजनिक गरेको छ ।

आयोगले बिहीबार राष्ट्रपतिलाई प्रतिवदेन बुझाउने र पुस २ गते आयोग पदाधिकारीले सातै प्रदेशमा प्रदेश प्रमुखलाई प्रतिवेदन बुझाउने प्रमुख निर्वाचन आयुक्त दिनेश थपिलयाले जानकारी दिए । प्रतिवेदन राष्ट्रपति र प्रदेश प्रमुखसमक्ष बुझाएपछि राजपत्रमा प्रकाशित हुनेछ ।
निर्वाचन परिणाम र दलका सदस्यहरु यस अघि नै निर्वाचित भएको सार्वजनिक भएपनि निर्वाचन आयोगले औपचारिकता पूरा गरेको हो । आयोगको निर्वाचन प्रतिवेदन राष्ट्रपतिले बुझेको मितिले १ महिना भित्र संसदको नयां र पहिलो वैठक बस्नु पर्नै सवैधानिक प्राव्धान छ ।

४ हजार ८५ जना उम्मेदवार र ४० दलको धरौटी जफत 

मंसिर ४ गते भएको प्रतिनिधिसभा निर्वाचनमा १० प्रतिशत मत कटाउन नसक्ने ४ हजार ८५ जना उम्मेदवारको धरौटी खोसिएको छ।

निर्वाचन आयोगले बुधबार अन्तिम मत परिणाम सार्वजनिक गर्ने क्रममा उक्त जानकारी दिएको हो।

‘जम्मा मतको १० प्रतिशत नल्याउने प्रतिनिधिसभातर्फका १७ सय ७२ पुरुषसहित १९ सय ६१ जना र प्रदेशसभातर्फ २ हजार ८६ पुरुष र २३७ महिला उम्मेदवारको जमानत जफत भएको छ’, प्रमुख निर्वाचन आयुक्त दिनेश थपलियाले भने, ‘यसो गर्दा प्रदेश र प्रतिनिधिसभा दुवैतर्फ जम्मा ४ हजार ८५ जना उम्मेदवारको धरौटी जफत भएको छ।’

उनका अनुसार प्रत्यक्ष र समानुपातिकतर्फ कुनै एक सिट नपाएका दलहरुको पनि धरौटी जफत भएको छ।

‘समानुपातिकतर्फ बन्द सूची पेश गर्ने ४७ मध्ये ४० दलको धरौटी जफत भएको छ’, उनले भने, ‘प्रतिनिधिसभाको समानुपातिकतर्फ कम्तीमा ३ प्रतिशत मत ल्याउनुपर्छ। पहिलो हुने निर्वाचनतर्फ १ सिट पाउनै पर्छ। यस्तोमा सातवटा दलले मात्रै राष्ट्रिय दलको मान्यता पाएका छन्।’