काठमाडौं, १ असार । १६औँ संस्करणको युइएफए युरो कप २०२० फुटबल प्रतियोगितामा पोल्यान्ड स्लोभाकियासँग पराजित भएको छ । सोमबार राति रसियास्थित क्रेस्टोभ्स्कीमा भएको खेलमा स्लोभाकियासँग पोल्यान्ड २–१ गोलले पराजित भएको हो ।

स्लोभाकियाका लागि मिलान स्क्रिनियरले एक गोल गरे । स्लोभाकियाले एउटा आत्मघाती गोल उपहारमा पाएको थियो । पोल्यान्डका कारोल लिनेट्टीले एक गोल गरे ।

स्लोभाकियाले आत्मघाती गोलबाट सुरुआती अग्रता बनाएको थियो । १८औँ मिनेटमा वोजचेइक स्जेन्सीले आफ्नै पोस्टमा गोल गरेपछि स्लोभाकियाले अग्रता बनायो ।

४६औँ मिनेटमा लिनेट्टीले गोल गर्दै पोल्यान्डलाई खेलमा फर्काए । ६२औँ मिनेटमा ग्रिजेगर्ज क्रिचौइकले रातो कार्ड पाएपछि पोल्यान्ड दस खेलाडीमा सीमित बनेको थियो ।

त्यसको फाइदा उठाउँदै स्क्रिनियरले गोल गर्दै स्लोभाकियालाई २–१ गोलले जिताए ।

जितसँगै स्लोभाकिया समूह ‘ई’को शीर्ष स्थानमा उक्लिएको छ । उसले तीन अङ्क जोडेको छ । उक्त समूहमा स्पेन एक अङ्कसहित दोस्रो स्थानमा छ भने समान अङ्क जोडेको स्विडेन तेस्रो स्थानमा छ ।

स्पेन र स्विेडनले गए राति १–१ गोलको बराबरी खेल्दै अङ्क बाँडेका हुन् । यता, अङ्कविहीन पोल्यान्ड उक्त समूहको पुछारमा छ ।