काठमाडौं, १२ साउन । मन्त्रिपरिषद् बैठक सुरु भएको छ । प्रधानमन्त्री निवास बालुवाटारमा सुरु बैठकमा लकडाउन खुला गरेपछिको अवस्था र अबको रणनीतिलगायतका विषयमा छलफल हुने एक मन्त्रीले जानकारी दिनुभयो ।

बैठकमा लकडाउन खुला गरिएको अवस्थाको समीक्षा हुने र रोकिएका विभिन्न तहका परीक्षा लगायतमासमेत छलफल हुने स्रोतको दावी छ। त्यस्तै, नेपाल प्रहरीका रिक्त दुई एआइजी बढुवाको निर्णय आजकै बैठकबाट हुने भएको छ ।

एआइजीका लागि निरजबहादुर शाही र प्रधुम्न कार्कीको नाम सिफारिस भइसकेको छ । त्यस्तै, अन्य मन्त्रालयगत निर्णय हुने ती मन्त्रीले बताउनुभयो ।

बैठकमा राष्ट्रिय खेलकुद परिषदको सदस्य सचिव चयन र लगानी बोर्डका प्रमुख कार्यकारी अधिकृत नियुक्ति लगायतका निर्णय हुने बताइएको छ।

राष्ट्रिय खेलकुद परिषदको सदस्य सचिवमा निवर्तमान सदस्य सचिव रमेश सिलवालसहित लिलबहादुर थापा र अञ्जु श्रेष्ठको नाम सिफारिस गरिएको छ । यस्तै अर्थमन्त्री नेतृत्वको सिफारिस समिति लगानी बोर्डको सीईओका लागि तीन जनाको नाम सिफारिस गरिएको छ।