काठमाडौं, ७ चैत । (कोभिड–१९) को जोखिम हुन नदिन सरकारले काठमाडौंका ५० शैया भन्दामाथिका अस्पतालहरूलाई अत्यावश्यक बाहेकका परीक्षण र शल्यक्रिया नगर्न निर्देशन दिएको छ । सामान्य मानिस पनि अस्पतालमा स्वास्थ्य परीक्षण गर्न आउन थालेपछि भीडभाड बढेको भन्दै स्वास्थ्य तथा जनसंख्या मन्त्रालयले चैत मसान्तसम्मका लागि तत्काल नगरी नहुने बाहेकका स्वास्थ्य परीक्षण र शल्यक्रिया बन्द गर्न निर्देशन दिएको हो ।

नोवल कोरोना कोभिड–१९ भाइरसको संभावित जोखिमबाट यस्तो उपाय अपनाइएको हो । अस्पतालमा सामान्य नागरिकको भीड बढ्दा बिरामी छुट्याउनै समस्या भयो, भीडभाडले सङ्क्रमणमा झनै चुनौती छ ।” अस्पतालबाटै सो भाइरसको सङ्क्रमण सर्न सक्ने जोखिम हुँदा अस्पताल जानुपर्ने अत्यावश्यक समयबाहेक अघिपछि अस्पताल नआउन चिकित्सकले सुझाएका छन् ।

मन्त्रालयद्वारा शुक्रबार जारी १५ बुँदे निर्देशनमा भनिएको छ, ‘काठमाडौं उपत्यकाका ५० बेड र सोभन्दामाथिका अस्पतालहरूलाई तत्काल आवश्यक नपर्ने स्वास्थ्य परीक्षण तथा शल्यक्रिया सम्बन्धित सेवाहरू आउँदो चैत मसान्तसम्मका लागि बन्द गर्ने निर्देशन दिने ।’मन्त्रालयले कोरोनाका शंकास्पद बिरामीलाई अन्य अस्पतालमा पठाउन नपाउने र प्राथमिकता दिएर उपचार गर्नुपर्ने निर्देशन दिएको छ । परीक्षणा पोजेटिभ आएमा अरुलाई नसर्ने गरी आइसोलेसनमा राख्ने र सम्बन्धित अस्पतालमा पठाउने व्यवस्था गर्नुपर्ने उल्लेख छ ।